سوشل میڈیا کے ذریعے ملی ٹنسی اور علاحدگی پسندی سے متعلق مواد شیئر کرنے سے گریز کریں: ایس ایس پی بارہمولہ کی لوگوں سے اپیل

سرینگر، 7 دسمبر

سینئر سپر انٹنڈنٹ آف پولیس (ایس ایس پی) بارہمولہ امود اشوک ناگپوری نے لوگوں سے سوشل میڈیا سائیٹوں پر ملی ٹںسی سے اور علاحد گی پسندی سے متعلق مواد کو پوسٹ یا شیئر کرنے سے گریز کرنے کی تاکید کی ہے۔انہوں نے کہا کہ اس قسم کا مواد شیئر کرنے والوں کے خلاف سخت کارروائی انجام دی جائے گی۔

موصوف ایس ایس پی نے ان باتوں کا اظہار جمعرات کو ایک پریس کانفرنس سے خطاب کے دوران کیا۔انہوں نے کہا: ‘ضلع مجسٹریٹ بارہمولہ نے 30 نومبر کو ایک حکمنامہ جاری کیا جس کے تحت سوشل میڈیا کے ذریعے دہشت گردانہ تنظیم سے وابستہ کسی پوسٹ کو شیئر کرنے یا پوسٹ کرنے، جس سے دہشت گردانہ کارروائیوں کو فروغ ملے یا لوگوں میں ڈر پیدا ہوجائے یا مذہبی ہم آہنگی کو نقصان پہنچے، پر پابندی لگائی گئی ہے’۔ان کا کہنا تھا: ‘ایسا کرنا یو اے پی اے ایکٹ اور تعزیرات ہند کے دوسرے دفعات کے تحت قانونی طور پر جرم ہے’۔

ناگپوری نے کہا کہ اگر کوئی بھی شخص دہشت گرد تنظیموں یا علاحد پسندوں کے کسی پوسٹ یا مسیج کو اپنے سوشل میڈیا ہینڈل پر پوسٹ کرتا ہے یا شیئر کرتا ہےتو یہ جرم ہے۔انہوں نے کہا کہ ایسے سوشل میڈیا ہینڈلرس کے خلاف کارروائی کرنے کے لئے پولیس نے تمام تیاریاں کی ہیں۔ان کا کہنا تھا: ‘جن لوگوں کو ایسی مسیجز آتی ہیں اور وہ خود ایسا مواد شیئر یا پوسٹ نہیں کرتے ہیں انہیں چاہئے کہ وہ اس کے متعلق فوری طور پر نزدیکی پولیس اسٹیشن کے ساتھ رابطہ کریں’۔انہوں نے کہا کہ ایسا نہ کرنے والوں کے خلاف بھی تحت قانون کارروائی ہوگہ۔ایس ایس پی نے والدین سے اپیل کی کہ وہ اپنے بچوں خاص کر کمسن بچوں کے ذریعے سوشل میڈیا کے ذمہ دار استعمال کو یقینی بنائیں تاکہ وہ کسی قسم کی پریشانی سے دو چار نہ ہوسکیں۔