چلہ کلان کے تیور سخت ،جموں ، کشمیر اور لداخ میں شدید سردی کی لہر جاری

موسمی صورتحال میںتبدیلی کا امکان ، آج سے ہلکی سے درمیانی درجے کی برفباری اور بارشیں ہوسکتی ہے / محکمہ موسمیات

سرینگر/25دسمبر: بادشاہ چلہ کلان کے سخت تیور کے بیچ سردی کی لہر نے وادی کو اپنی لپیٹ میں لے لیا جبکہ سرینگر میں مسلسل درجہ حرارت نقطہ انجماد سے نیچے گر کر منفی4.3ڈگری ریکارڈ کیا گیا۔ادھرجموں میں بھی شدید سردی کی لہر جاری ہے ۔ادھر محکمہ موسمیات نے آج سے موسمی صورتحال میں تبدیلی آنے کے امکانات ظاہر کرتے ہوئے بارشوں اور برفباری کی پیشگوئی کی ہے ۔ سی این آئی کے مطابق شدید سردی کی لہر نے وادی کو اپنی لپیٹ میں لے لیا ہے اور اس دوران صبح و شام یخ بستہ ہواؤں کی وجہ سے عام زندگی معطل ہو کر رہ گئی ہے۔اگرچہ رات بھر آسمان کھلا رہتا ہے تاہم اس دوران کھلے آسمان کی وجہ سے سردی میں بے پناہ اضافہ ہو رہا ہے جبکہ رات کے وقت ہڑیوں کو گلا دینے والی اس سردی کی وجہ سے بیشتر لوگ گھروں سے باہر نہیں آتے۔دن بھر اگر چہ کبھی کبھی فضاء میں سورج بھی جلوا ہ افروز ہوتا تاہم اس دوران بھی سرد ہواؤں کی لہر سورج کی تمازت کو کھا جاتی ہے۔شہر سرینگر سمیت وادی کے جنوب و شمال میں سردیو ں کی وجہ سے صبح دیر سے دن شروع ہوتا ہے اور شام کو جلد ہی رات ہونے کی وجہ سے اوقات کار میں بھی کمی آئی ہے۔ موسم سرماکی آمد کے ساتھ ہی وادی میں عام زندگی اگر چہ متاثر ہوتی ہے تاہم سخت ترین سردیوں اور یخ بستہ ہواؤں کی وجہ سے اس میں اضافہ ہوتا ہے۔ دریں اثناء سرینگر سمیت وادی کے بیشتر علاقوں میں درجہ حرارت بھی نقطہ انجماد سے مسلسل نیچے گر گیا اورجمعرات اور جمعہ کی شب بھی سرد ترین رات کے طور پر ریکارڈ کی گئی۔ سرینگر میں بھی درجہ حرارت کے گرنے کی وجہ سے موسم کی انتہائی سرد رات کو ریکارڈ کیا گیا جبکہ مجموعی طور پر منفی 4 اعشاریہ 3ڈگری کادرجہ حرارت ریکارڈ کیا گیا۔ ادھر معلوم ہوا ہے کہ وادی کے دیگر علاقوں میں بھی سرد لہر جاری ہے۔خطہ لداخ کا لیہہ بدستور ریاست کی سرد ترین جگہ بنی ہوئی ہے، جہاں کم سے کم درجہ حرارت منفی 10اعشاریہ ایک ڈگری ریکارڈ کیا گیا۔ جمعہ کی صبح پینے کے پانی کے نل منجمند پائے گئے۔ کچھ ایک آبی ذخائر کو بھی جزوی طور پر منجمند پایا گیا۔ تاہم سری نگر سمیت وادی کے تمام علاقوں میں دوپہر ایک بجے سے اچھی خاصی دھوپ کھلی رہی۔ شمالی کشمیر میں واقع شہرہ آفاق سیاحتی مقام گلمرگ میں گذشتہ رات کم سے کم درجہ حرارت منفی 5اعشاریہ 5 ڈگری ریکارڈ کیا گیا۔ جنوبی کشمیر میں واقع مشہور سیاحتی مقام پہلگام میں کم سے کم درجہ حرارت منفی 5 اعشاریہ 9 ڈگری ریکارڈ کیا گیا۔ ادھر جموں میں بھی شدید سردی کی لہر جاری ہے جس کے نتیجے میں لوگوں کو شدید مشکلات کا سامنا ہے ۔ اسی دوران محکمہ موسمیات کے ایک ترجمان نے بتایا کہ جموں کشمیر میں اگلے چوبیس گھنٹوں کے دوران موسم میں تبدیلی آنے کا امکان ہے اور ہلکی سے درمیانی درجے کی بارشوں کے ساتھ ساتھ برفباری بھی ہو سکتی ہے ۔