ہند پاک سرحد پر جنگ جیسی صورتحال بر قرار ، گریز سیکٹر میں تازہ گولی باری اور شلنگ

سرینگر/16ستمبر: ہند پاک لفاظی جنگ کے بیچ پاکستان اور بھارت کے مابین جنگ جیسی صورتحال بنی ہوئی ہے اور جنگ بندی معاہد ے کی دھجیاں اڑانے کا سلسلہ جاری ہے ۔بدھ کو گریز سیکٹر میں ایک مرتبہ پھرہند پاک افواج کے مابین آمنا سامنا ہوا جس دوران دونوں ممالک کے افواج نے ایک دوسرے کی کو نشانہ بنا کر فائرنگ اور شلنگ کی جبکہ گزشتہ 24گھنٹوں میں نصف درجن سیکٹروں میںفائرنگ کے نتیجے میں فوجی اہلکار ہلاک ہو گیا جبکہ میجر سمیت تین دیگر زخمی ہو گئے ۔ سی این آئی کے مطابق ہند وپاک سرحدوں پر کشیدگی ختم ہونے کا نام نہیں لے رہی ہے۔ گزشتہ شب جموں و کشمیر کے ضلع پونچھ اور راجوری سیکٹروں میں لائن آف کنٹرول پر ہندوستان اور پاکستان کی فوج کے درمیان گولہ باری اور فائرنگ کا تبادلہ ہوا ۔ دفاعی ذرائع کے مطابق پاکستانی فوج نے بلا کسی اشتعال کے بھارتی چوکیوں کو نشانہ بنا کر گولہ باری اور فائرنگ شروع کر دی۔انہوں نے کہا کہ وہاں تعینات فوجی اہلکاروں نے اس حملے کا ’’بھرپور اور موثر‘‘ جواب دیاتاہم پاکستانی گولی باری کے نتیجے میں ایک فوجی اہلکار ہلاک ہو گیا جبکہ میجر سمیت تین فوجی اہلکار زخمی ہو گئے ۔ ادھر بدھ کی صبح بھی گریز سیکٹر میں بھی ہند پاک افواج کے مابین شدید نوعیت کی گولہ باری ہوئی ۔ دفاعی ترجمان کے مطابق پاکستانی افواج نے بدھ کی صبح قریب 11بجے بگتور سیکٹر میں بھارتی چوکیوںکو نشانہ بنا کر شدید نوعیت کی گولی باری اور شلنگ کی جس کا بی ایس ایف نے بھر پور انداز میں جوب دیا۔ ادھر سرحدوںپر مسلسل جنگ بندی کی معاہدے کی خلاف ورزی سے سرحدی آبادی میں تشویش کی لہر دوڑ رہی ہے اور وہ خوف و دہشت میں مبتلا ہو گئے ہیں ۔ لائن آف کنٹرول پر مسلسل فائرنگ اور شلنگ کے نتیجے میں شہری آبادی کو کافی نقصان اٹھانا پڑا ہے اور انسانی جانوں کے علاوہ مویشیوں کی بڑی تعداد بھی لقمہ اجل بن گئی ۔