ہند پاک سرحدی کشیدگی جاری ، پونچھ کے بعد اب راجوری سیکٹر میں محاذ گرم

سرینگر/10جون: ضلع راجوری کے نوشہرہ سیکٹر میں بدھ کے روز پاکستان اور بھارتی فوج کے مابین شدید گولہ باری ہوئی جس کے نتیجے میں سرحدی آبادی میں خوف وتشویش کی لہر دوڑ گئی ہے ۔ ادھر دفاعی ترجمان نے پاکستانی فوج پر ایک بار پھر جنگ بندی معاہدے کی خلاف ورزی کرنے کا الزام عائد کیا ہے ۔ کرنٹ نیوز آف انڈیا کے مطابق راجوری کے نوشہرہ سیکٹر میں ہندوپاک افواج کے مابین آج شدید گولہ باری ہوئی جس کی وجہ سے ضلع پونچھ کے مختلف سرحدی پٹیوں پر جنگ کا سماں بندھا رہا ۔بتایا جاتا ہے کہ بدھ کے روز سرحدی ضلع پونچھ میں بھارت اور پاکستانی افواج کے مابین شدید گولہ باری جاری رہی ۔ اس دوران دفاعی ذرائع نے بتایا کہ پاکستانی فوج نے آج ایک مرتبہ پھر جنگ بندی معاہدے کی خلاف ورزی کرتے ہوئے سیولین آبادی اور فوجی چوکیوں کو نشانہ بناتے ہوئے شدید گولہ باری کی جس کے بعد فوج نے بھی پاکستانی فوج کی فائرنگ کا بھر پور جواب دیا ۔ ذرائع کے مطابق سرحدی ضلع پونچھ میں بھی گذشتہ کئی دنوں سے پاک فوج بلااشتعال فائرنگ جاری رکھے ہوئے ہیں تاہم ابھی تک اس میں کسی بھی طرح کے جانے نقصان کی اطلاع نہیں ہے ۔ بتایا جاتا ہے کہ ضلع کے مختلف سرحدی علاقوںسے لوگوںنے نکل مکانی شروع کی ہے کیوں کہ ضلع میں آر پار گولہ باری رکھنے کا نام نہیں لے رہی ہے ۔ یاد رہے کہ ہندوستان اور پاکستان کے مابین جاری سیاسی کشیدگی کے بیچ سرحدوں پر بھی مسلسل کشیدگی بنی ہوئی ہے اور دونوں جانب فوج ایک دوسرے کے ٹھکانوں پر نشانہ سادھتے ہوئے گولہ باری کررہے ہیں جس کی وجہ سے سرحدی علاقوں میں خوف ودہشت کا ماحول پھیل گیا ہے اور کئی جگہوں سے اطلاع ہے کہ لوگ اپنے آشیانوں کو چھوڑ کر محفوظ مقاما ت کی طرف بھاگ رہے ہیں اور کئی علاقوں کے لوگوںنے نزدیکی بنے زمین دوز بنکروں میں پناہ لینے شروع کی ہے ۔