جمعہ کے روز اوڑی میں گولہ باری کے نتیجے میں مقامی لوگوں میں خوف طاری

بھارتی فوج کی گولہ باری سے ایک خاتون ہوئی زخمی۔ پاکستان کادعویٰ

سرینگر/02مئی: جمعہ کے روز اوڑی میں لائن آف کنٹرول پر گولہ باری کے نتیجے میں دو فوجی اہلکار ہلاک جبکہ دو بچوں سمیت چار افراد زخمی ہوئے جس کے نتیجے میں قصبہ اوڑی کے مختلف علاقوں میں لوگ اپنے گھروں میں سہم کے رہ گئے اور آج دوسرے روز بھی سرحدی آبادی اپنے گھروں میں خوف ودہشت کے سائے میں محصور ہے۔ دریں اثناء پاکستان نے دعویٰ کیا ہے کہ بھارتی فوج کی گولہ باری سے ایک خاتون زخمی ہوئی ہے۔کرنٹ نیوز آف انڈیا کے مطابق جمعہ کے روز سرحدی قصبہ اوڑی ضلع بارہمولہ میں صبح سے ہی آر پار شدید گولہ باری شروع ہوئی اور کئی گھنٹوں تک زبردست مورٹار شلنگ جاری رہی جسکے نتیجے میں دو فوجی اہلکار ہلاک ہوگئے ہیں جبکہ دو بچوں سمیت چار افراد زخمی ہوئے۔ ذرائع سے معلوم ہوا ہے کہ گذشتہ روز جمعہ کو شمالی کشمیر کے ضلع بارہمولہ میں سرحدی قصبہ اوڑی کے چرنڈا، باٹگرن، سلی کوٹ، بالکوٹ، نمبلہ،گرکوٹ اور دیگر علاقوں میں ہندوپاک افواج کے مابین گولہ باری کے نتیجے میں دوبچے اور2 لڑکیاں شاہنازہ بانو جس کی عمر بارہ سال بتائی جاتی ہے دختربشیر احمد اور طاہرہ بانو اہلیہ لیاقت علی چرنڈا نامی گاؤں میں زخمی ہوئیں جبکہ اس علاقے میں ایک رہائشی مکان بھی گولہ باری کی زد میں آکر تباہ ہوگیا ہے۔اس دوران پاکستانی کی گولہ باری کی زد میں آکر دو فوجی اہلکار زخمی ہوئے تھے جن کو فوری طور پر فوجی ہسپتال پہنچایاگیا تاہم وہ دوران علاج ہی ہسپتال میں زخموں کی تاب نہ لاکر دم توڑ بیٹھے۔ اس واقع کی تصدیق کرتے ہوئے سرکاری ذرائع نے بتایا کہ پاکستانی فوج نے مذکورہ علاقہ جات میں جمعہ کے روز بلا اشتعال بھارتی فوجی چوکیوں کو نشانہ بنانے کی غرض سے سخت گولہ بارہ کی جس کے نتیجے میں کئی مورٹار گولے رہائشی بستیوں میں بھی آگرے جس کے نتیجے دو بچے اور ایک لڑکی اور ایک عورت زخمی ہوئی ہے جبکہ دو فوجی اہلکار جو پہلے زخمی ہوئے تھے ہسپتال میں دم توڑ بیٹھے۔دفاعی ترجمان نے پاکستانی فوج پر جنگ بندی معاہدے کی خلاف ورزی کرنے کا الزام عائد کرتے ہوئے کہا کہ پاکستان کی بلا اشتعال گولہ باری کا بھر پور جواب دیا گیا۔ دریں اثناء آر پار گولہ باری کے نتیجے میں اوڑی قصبہ کے مختلف سرحدی علاقوں میں آج دوسرے روز بھی خوف و دہشت کا عالم طاری رہا اور لوگ اپنے ہی گھروں میں دم بخود محصور رہے۔ دریں اثناء پاکستان نے دعویٰ کیا ہے کہ بھارتی فوج کی گولہ باری کے نتیجے میں آج ایک اور خاتو ن زخمی ہوئی ہے جبکہ گزشتہ دنوں دو خواتین ازجان ہوئی تھیں۔