ہندو پاک افواج کے مابین ایک بار پھر آتشی گولہ باری؛پاکستانی فوج کے گولے کئی رہائشی مکانوں پر آگرے، کئی ڈھانچوں کو نقصان

سرینگر/25اپریل: ہندوستان اور پاکستان کی افواج کے مابین گولہ باری کے تبادلے کا نہ تھمنے والا سلسلہ جاری ہے۔تازی گوکی باری میں راجوری کے متعدد سرحدی علاقوں میں آتشی گولہ باری کے نتیجے نصف درجن کے قریب رہائشی مکانات اور دیگر ڈھانچوں کو نقصان پہنچا ہے جس کے نتیجے میں لوگ سخت خوف و دہشت میں مبتلاء ہوگئے ہیں جبکہ لوگوںنے انتظامیہ سے محفوظ بینکروں کی جلد تعمیر کا مطالبہ دہرایاہے ۔ کرنٹ نیوز آف انڈیا کے مطابق ایک طرف دنیا کوروناوائرس کے خلاف صف آراہے دوسری جانب پاکستان اور ہندوستان کی افواج ایک دوسرے خلاف خلاف مورچہ کھولے ہوئے ہیں جس کے نتیجے میں سرحدی آبادی شدید خوف و دہشت میں مبتلاء ہوچکی ہے ۔ ذرائع نے بتایا کہ ہندوپاک افواج نے سنیچر کے روز راجوری میں واقع کنٹرول لائن پر ایک دوسرے کے ٹھکانوں کو گولیوں اور مارٹروں سے نشانہ بنایا۔جس کے نتیجے میں دونوں جانب سرحدی علاقوں میں خوف و دہشت کا ماحول پھیل گیا ہے جبکہ پاکستانی فوج کی جانب سے داغے گئے کئی مورٹار گولے رہائشی مکانوںپر آگے جس کے نتیجے میں متعدد مکانات کو نقصان پہنچنے کی اطلاع ہے جبکہ اس گولہ باری کے نتیجے میں کئی دیگر ڈھانچوں کو بھی نقصان پہنچا ہے ۔ ذرائع کے مطابق اس دوران دفاعی ذرائع نے پاکستانی فوج پر الزام عائد کرتے ہوئے کہا ہے کہ پاکستانی فوج نے راجوری میں آج صبح ایک بار پھر بھارتی فوجی چوکیوں کو نشانہ بناتے ہوئے شدید گولہ باری کی جس کے جواب میں فوج نے بھی پاک فوجی چوکیوں کو نشانہ بناتے ہوئے گولہ باری کی ۔ ذرائع کے مطابق دونوں افواج کے مابین فائرنگ کا واقعہ ضلع راجوری کے نوشہرہ سیکٹر اور مار کھور میں آج صبح پیش آیا۔ذرائع نے کہا کہ طرفین نے ایک دوسرے کیخلاف ہلکے اور بھاری ہتھیاروں کا استعمال کیا گیا۔ادھر بھارتی فوجی ذرائع نے پاکستانی فوج پر الزام عائد کیا ہے کہ پاکستانی فوج نے جنگ بندی معاہدے کی خلاف ورزی کرتے ہوئے بلااشتعال فائرنگ کی ۔ یاد رہے کہ ایک طرف دنیا کوروناوائرس سے لڑنے میں مصروف ہے اور اس وبائی وائرس سے اب تک عالمی سطح پر ایک لاکھ 90ہزار کے قریب افراد فوت ہوچکے ہیں دوسری طرف ہندوپاک افواج ایک دوسرے کی خون کی پیاسی بنی ہوئی ہے اور آئے روز سرحدوں پر شدید گولہ باری کے واقعات رونماء ہورہے ہیں ۔ (سی این آئی )