کشمیر: مزید دو سیاسی رہنما، ایم ایل اے ہوسٹل سے رہا

مرحلہ وار بنیادوں پر انتظامیہ کی جانب سے وادی کے مختلف سیاسی جماعتوں کے رہنماؤں اور کارکنان کی رہائی عمل میں لائی جارہی ہے جو گزشتہ برس کے 5 اگست سے بند یا نظربند ہیں۔

آج پیپلز کانفرنس کے سجاد غنی لون اور پی ڈی پی کے وحید پرہ کو رہا کیا گیا ہے لیکن ان دونوں رہنماؤں کو ایم ایل اے ہوسٹل سے رہائی کے بعد اب اپنے ہی گھروں میں نظر بند رکھا گیا ہے۔
چند روز قبل ایم ایل اے ہوسٹل میں بند کئی سیاسی رہنماؤں اور کارکنان کی رہائی عمل میں لائی گئی تھی جن میں نیشنل کانفرنس کے عبدالمجید لارمی، غلام نبی بٹ، ڈاکڑ محمد شفیع اور محمد یوسف بٹ شامل ہیں۔
دوسر جانب کانگریس، نیشنل کانفرنس اور پی ڈی پی کے علاوہ دیگر سیاسی جماعتوں سے وابستہ متعدد رہنماؤں اور کارکنان کو بھی ابھی تک رہا کیا جا چکا ہے۔
اگرچہ وادی کشمیر میں سیاسی سرگرمیوں کی بحالی کے لیے مرحلہ وار طریقے سے رہنماؤں اور کارکنان کی رہائی کو ممکن بنایا جا رہا لیکن جموں وکشمیر کے تین سابق وزرائے اعلی عمر عبدالللہ، محبوبہ مفتی اور فاروق عبداللہ ہنوز نظربند ہیں۔

سابق وزیراعلی اور رکن پارلیمان فاروق عبداللہ جہاں گزشتہ سال 5 اگست سے اپنے ہی گھر میں نظر بند ہیں۔ وہیں نیشنل کانفرنس کے عمر عبداللہ اور پی ڈی پی کی محبوبہ مفتی بھی گزشتہ تقریباً 6 ماہ کے زائد عرصے سے نظربند ہیں۔
واضح رہے انتظامیہ کی جانب سے مختلف سیاسی جماعتوں کے رہنماؤں اور کارکنان کی مرحلہ وار طریقے سے رہائی کو ممکن بنایا جا رہا ہے۔