ڈائریکٹر جنرل سی آئی ایس ایف کا دورہ پہلگام ، سیکورٹی اور دیگر انتظامات کا جائز ہ لیا

مرکزی صنعتی سیکورٹی فورس (سی آئی ایس ایف) کے ڈائریکٹر جنرل پرویر رنجن نے امرناتھ یاترا کے دوران پہلگام میں واقع ننوان بیس کیمپ کا تفصیلی دورہ کرکے وہاں سیکورٹی انتظامات کا جائزہ لیا۔ انہوں نے تمام سیکورٹی اہلکاروں کو ہدایت دی کہ یاترا کے اختتام تک اعلیٰ ترین سطح کی آپریشنل تیاری، مستقل چوکسی اور مختلف سیکورٹی ایجنسیوں کے درمیان مو¿ثر ہم آہنگی کو ہر حال میں برقرار رکھا جائے تاکہ یاتریوں کی جان و مال کا مکمل تحفظ اور ان کی سہولیات یقینی بنائی جا سکیں۔

ڈائریکٹر جنرل نے بیس کیمپ میں تعینات مختلف سیکورٹی یونٹوں کی تیاری، نفری کی تعیناتی، داخلی و خارجی راستوں پر قائم چیکنگ سسٹم، نگرانی کے جدید انتظامات، مواصلاتی نظام، طبی سہولیات، ہنگامی امدادی اقدامات اور مختلف مرکزی نیم فوجی دستوں، جموں و کشمیر پولیس، سول انتظامیہ اور دیگر متعلقہ اداروں کے درمیان رابطہ کاری کا تفصیلی جائزہ لیا۔دورے کے دوران ڈائریکٹر جنرل کے ہمراہ ایڈیشنل ڈائریکٹر جنرل (شمالی زون) سدھیر کمار اور ڈی آئی جی نارتھ زون ایم کے یادو سمیت سی آئی ایس ایف کے متعدد اعلیٰ افسران بھی موجود تھے

ڈی جی سی آئی ایس ایف نے نون وَن بیس کیمپ میں قائم اہم سیکورٹی مقامات کا معائنہ کیا جن میں مختلف چیک پوسٹیں، کمیونیکیشن سینٹر، سی آر پی ایف کی تعیناتی کے مقامات، کوئیک رسپانس ٹیمیں ، کوئیک ایکشن ٹیمیں ، سی سی ٹی وی کنٹرول روم، جوائنٹ پولیس کنٹرول روم اور لاجسٹک انتظامات شامل تھے۔ انہوں نے ہر مقام پر موجود افسران سے سیکورٹی صورتحال، ہنگامی ردعمل کے منصوبوں اور یاتریوں کی حفاظت کے لیے اختیار کیے گئے اقدامات کے بارے میں تفصیلی معلومات حاصل کیں۔ترجمان کے مطابق دورے کے دوران تخریب کاری کی روک تھام، حساس علاقوں میں مسلسل نگرانی، علاقے پر مو¿ثر کنٹرول، ہجوم کے بہتر انتظام، یاترا راستوں کی مکمل حفاظت اور کسی بھی ہنگامی صورتحال سے فوری طور پر نمٹنے کی تیاری پر خصوصی زور دیا گیا۔