نیشنل کانفرنس کو اب میری ضرورت نہیں، جنتر منتر احتجاج میں حصہ نہیں لوں گا / / آغا روح اللہ

نیشنل کانفرنس کے ممبر پارلیمنٹ آغا سید روح اللہ مہدی نے کہا کہ پارٹی کو اب ان کی ضرورت نہیں رہی، اسی لیے نہ انہیں پارٹی کنونشن میں مدعو کیا گیا اور نہ ہی وہ اس میں شریک ہوئے۔ انہوں نے یہ بھی واضح کیا کہ وہ نیشنل کانفرنس کی جانب سے ریاستی درجے کی بحالی کے مطالبے پر دہلی کے جنتر منتر میں ہونے والے احتجاج میں حصہ نہیں لیں گے۔

کولگام میں میڈیا نمائندوں کے ساتھ بات کرتے ہوئے آغا روح اللہ نے کہا کہ مرحومہ بیگم اکبر جہاں کی برسی کے سلسلے میں منعقدہ نیشنل کانفرنس کے کنونشن میں ان کی عدم شرکت پر بار بار سوال کیا جا رہا ہے، حالانکہ حقیقت یہ ہے کہ انہیں اس پروگرام میں مدعو ہی نہیں کیا گیا تھا۔انہوں نے کہا”مجھے کتنی بار اس سوال کا جواب دینا پڑے گا؟ انہیں اب میری ضرورت نہیں ہے۔ مجھے نہ بلایا گیا اور نہ ہی میں وہاں موجود تھا۔

اس دوران محرم الحرام کے حوالے سے کولگام، سرینگر اور دیگر مقامات پر میرے پہلے سے طے شدہ پروگرام تھے، جن میں میں مصروف رہا۔ پارٹی کو اب میری ضرورت نہیں رہی“۔جنتر منتر میں نیشنل کانفرنس کے مجوزہ احتجاج میں شرکت سے متعلق سوال کے جواب میں آغا روح اللہ نے دوٹوک انداز میں کہا کہ وہ اس احتجاج کا حصہ نہیں بنیں گے کیونکہ ان کی ترجیح جموں و کشمیر کے عوام کے اصل سیاسی مسائل ہیں۔

نہوں نے کہا”وہ ریاستی درجے کی بحالی کے لیے احتجاج کر رہے ہیں، حالانکہ عوام نے انہیں صرف اسی مقصد کے لیے مینڈیٹ نہیں دیا تھا۔ میں جموں و کشمیر کے عوام کے درمیان جاو¿ں گا اور دفعہ 370 کے مسئلے پر بات کروں گا۔ میری جدوجہد عوام کے اصل ایجنڈے کے لیے ہوگی“۔