وادی کشمیر میں شدید گرمیوں کے بعد موسم بدل گیا جس دوران دن بھر ابر آلود موسم رہنے سے گرمی کی لہر میں کمی محسوس کی گئی ۔
ادھر محکمہ موسمیات نے آئندہ 48گھنٹوں تک بارشوں کی پیشگوئی کی ہے ۔ محکمہ موسمیات مرکز سرینگر نے جموں و کشمیر کیلئے آئندہ دس روزہ موسمی پیشگوئی جاری کرتے ہوئے مختلف علاقوں میں بارش، گرج چمک، شدید بارش اور فلیش فلڈ کے خطرات کے پیش نظر عوام کو احتیاط برتنے کی ہدایت دی ہے۔محکمہ کے مطابق 11 اور 12 جولائی کے دوران جموں و کشمیر کے بیشتر علاقوں میں ایک یا دو مرتبہ بارش اور گرج چمک کے ساتھ بادل برسنے کا امکان ہے۔ بالخصوص چناب ویلی اور جموں ڈویژن کے پیر پنجال رینج کے چند مقامات پر موسلادھار بارش یا مختصر دورانیے کی انتہائی شدید بارش متوقع ہے، جس سے نشیبی علاقوں میں پانی جمع ہونے اور معمولات زندگی متاثر ہونے کا خدشہ ہے۔محکمہ موسمیات کے مطابق 13 سے 17 جولائی تک موسم عمومی طور پر گرم رہنے کا مکان ہے تاہم اس دوران مختلف مقامات پر وقفے وقفے سے بارش اور گرج چمک ہوسکتی ہے۔
جموں صوبے کے بعض الگ تھلگ علاقوں میں مختصر وقت کے لیے شدید بارش بھی متوقع ہے۔محکمہ موسمیات کے مطابق 18 سے 20 جولائی کے دوران ایک مرتبہ پھر بارشوں کا نیا سلسلہ سرگرم ہونے کا امکان ہے، جس کے تحت جموں و کشمیر کے کئی علاقوں میں ہلکی سے درمیانی درجے کی بارش اور گرج چمک کے ساتھ بادل برس سکتے ہیں۔ادھر محکمہ موسمیات نے خبردار کیا ہے کہ 11 اور 12 جولائی کی دوپہر، شام، رات اور علی الصبح کے اوقات میں چند مقامات پر شدید یا انتہائی شدید بارش ہوسکتی ہے، جس کے نتیجے میں فلیش فلڈ، لینڈ سلائیڈنگ اور مٹی کے تودے گرنے کے واقعات پیش آنے کا اندیشہ ہے۔
Comments are closed.