گیس ایجنسی فراڈ معاملے میں چارج شیٹ داخل:سی بی کے

سری نگر، 2 دسمبر

کرائم برانچ کشمیر(سی بی کے) کی اقتصادی جرائم شاخ نے 38 لاکھ روپیوں کے گیس ایجنسی گھپلہ معاملے میں بڈگام کی عدالت میں چارج شیٹ داخل کی ہے۔
اقتصادی جرائم شاخ کے ایک ترجمان نے اپنے ایک بیان میں کہا کہ سی بی کے نے آر پی سی کے متعلقہ دفعات کے تحت درج ایف آئی آر زیر نمبر21/2022 کے سلسلے میں زاہد بشیر شگو ولد بشیر احمد شگو ساکن کوکر بازار سری نگر حال مکان نمبر2، اندرابی کالونی نارہ بل ضلع بڈگام اور شگفتہ زوجہ بشیر شگو کے خلاف عدالت مجسٹریٹ درجہ اول بڈگام میں چارج شیٹ دائر کی ہے۔
انہوں نے کہا کہ یہ کیس ایک تحریری شکایت سے شروع ہوا جس میں الزام لگایا گیا تھا کہ ملزم زاہد بشیر شگو نے دھوکے سے گیس ایجنسی کا لائسنس دلوانے کا وعدہ کیا جس کے بدلے شکایت گذار نے 38 لاکھ روپیے کی رقم ادا کی اور بعد میں ملزم نے شکایت گذار کو جعلی اور من گھڑت دستاویزات فراہم کیں جو بظاہر اصل لائسنسز کے طور پر پیش کی گئیں۔
ان کا کہنا ہے کہ تحقیقات کے دوران بادی النظر میں الزامات درست پائے گئے اور یہ بات سامنے آئی کہ ملزم زاہد بشیر شگو نے اپنی اہلیہ شگفتہ کے ساتھ مجرمانہ سازش کے تحت شکایت گذار سے گیس ایجنسی اور اس کے ایکسٹنشن کائونٹر فراہم کرنے کے بہانے لاکھوں روپیے وصولے اور اس مقصد کے لئے جعلی دستاویزات فراہم کیں۔
موصوف ترجمان نے بتایا کہ اس طرح ان کے خلاف آر پی سی کے 419،420،468،471 اور 120- بی کے جرائم پائے گئے۔
انہوں نے کہا کہ مزید تفتیش نے ان کے مجرمانہ عمل کے ثبوتوں کو مضبوط کیا جس کے نتیجے میں باقاعدہ چارج شیٹ عدالتی کارروائی کے لئے پیش کی گئی۔
ان کا کہنا ہے کہ چونکہ دونوں ملزمان فرار ہیں اس لئے چارج شیٹ ضابطہ فوجداری کی دفعہ512 کے تحت عدم موجودگی میں پیش کی گئی۔
بیان میں کہا گیا کہ مذکورہ ملزموں کے خلاف پولیس اسٹیشن کرائم برانچ آر پی سی کے متعلقہ دفعات کے تحت زیر ایف آئی آر نمبر 13/2018 ایک سابقہ مقدمے میں پہلے ہی ایک چالان پیش کیا جا چکا ہے جو ان کی اسی نوعیت کی سرگرمیوں کے تسلسل کی نشاندہی کرتا ہے۔
انہوں نے کہا کہ اس کے علاوہ زاہد بشیر شگو کے خلاف پولیس اسٹیشن اقتصادی جرائم ونگ میں ایک اور مقدمہ زیر ایف آئی آر نمبر31/2023 زیر تحقیق ہے جس کے تفتیش آخری مراحل میں ہے اور جلد ہی مکمل ہوگی۔