کٹھوعہ آپریشن:علاقے میں انسداد ملی ٹنسی آپریشن دوبارہ بحال

جموں، 28 مارچ

جموں و کشمیر کے ضلع کٹھوعہ کے گھٹی جوتھانہ جنگلاتی علاقے میں جمعہ کی صبح سیکورٹی فورسز نے انسداد ملی ٹنسی آپریشن دو بارہ شروع کر دیا جہاں اطلاعات مطابق گذشتہ روز انکاؤنٹر کے دوران 3 ملی ٹنٹ ہلاک جبکہ 3 پولیس اہلکار جاں بحق ہوئے تھے۔ذرائع کے مطابق اس انکاؤنٹر میں ایک ڈی ایس پی سمیت سات دیگر جوان زخمی ہوئے ہیں۔انہوں نے بتایا کہ جمعہ کی صبح روشنی کی پہلی کرن کے ساتھ ہی تلاشی آپریشن پارٹیوں نے علاقے میں وسیع پیمانے پر آپریشن شروع کر دیا۔

اطلاعات کے مطابق جمعہ کی صبح تلاشی آپریشن کے دوران طرفین کے دوران ایک بار پھر فائرنگ کا تبادلہ ہوا ہے۔بتایا کہ جاتا ہے کہ وہاں ابھی بھی ایک یا دو ملی ٹنٹ موجود ہیں۔واضح رہے کہ جمعرات کی صبح کٹھوعہ کے گھٹی جوتھانہ جنگلاتی علاقے میں تلاشی آپریشن کے دوران ملی ٹینٹوں اور فورسز کے درمیان اچانک فائرنگ کا تبادلہ ہوا تھا۔

ذرائع نے بتایا کہ طرفین کے درمیان فائرنگ کے تبادلے کے ساتھ ہی فوج ، بی ایس ایف اور پولیس کے اضافی دستوں کو اس جنگلاتی علاقے کی طرف روانہ کیا گیا تھا تاکہ ملی ٹینٹوں کو فرار ہونے کا کوئی موقع فراہم نہ ہو سکے۔ان کا کہنا تھا کہ سیکورٹی فورسز کے دستوں نے کئی کلومیٹر جنگلی علاقے کو پوری طرح سے سیل کردیا ہے۔دفاعی ذرائع کے مطابق ملی ٹینٹوں کو انجام تک پہنچانے کی خاطر جدید ٹیکنالوجی کو بھی بروئے کار لایا جارہا ہے۔انہوں نے کہا کہ ہیلی کاپٹروں، کواڈ کاپٹروں اور ڈرون کیمروں کی مدد سے جنگلی علاقے پر نظر گذر رکھی جارہی ہے۔

دریں اثنا فوج کی رائزنگ سٹار کور نے اس انکائونٹر کے دوران جاں بحق ہونے والے پولیس جوانوں کو شاندار خراج عقیدت پیش کیا ہے۔انہوں نے ‘ایکس’ پر ایک پوسٹ میں کہا: ‘رائزنگ سٹار کور جموں و کشمیر پولیس کے ان اہلکاروں کی بہادری اور ان کے ناقابل تسخیر جذبے کو سلام پیش کرتا ہے جنہوں نے کٹھوعہ میں آپریشن سیفیان کے دوران بہادری سے لڑتے ہوئے اپنی جانیں نچھاور کیں۔