سونہ مرگ میں زڈ مورہ ٹنل کا افتتاح کرنے کے لئے بے صبری سے انتظار کررہا ہوں: وزیر اعظم نریندر مودی

سری نگر11جنوری

وزیر اعظم نریندر مودی نے ہفتے کی شام کو کہا کہ سونہ مرگ میں زڈ مورہ ٹنل کا افتتاح کرنے کے لئے دورے کا بے صبری سے انتظار کررہا ہوں۔

انہوں نے کہاکہ اس ٹنل کی وجہ سے شعبہ سیاحت اور مقامی معیشت کو بھی فروغ مل پائے گا۔

بتادیں کہ وزیر اعظم نریندر مودی 13جنوری کو گگن گیر سونہ مرگ میں 2717کروڑ روپیہ کی لاگت سے تیار زڈ مورہ ٹنل کا افتتاح کریں گے ۔

اطلاعات کے مطابق وزیر اعظم نریندر مودی کا کہنا ہے کہ جموں وکشمیر کے سونہ مرگ میں زڈ مورہ ٹنل کا افتتاح کرنے کے لئے بے صبری کے ساتھ انتظار کر رہا ہوں۔

انہوں نے وزیر اعلیٰ عمر عبداللہ سے مخاطب ہوتے ہوئے کہا :’ آپ نے اس ٹنل سے شعبہ سیاحت اور مقامی معیشت کو پہنچنے والے فائدے کی اچھی نشاندہی کی ہے۔‘

وزیر اعظم نے کہا کہ فضائی تصاویر اور ویڈیوز کو بہت پسند کیا۔

واضح رہے کہ وزیر اعلیٰ عمر عبداللہ نے وزیر اعظم دورے کے حوالے سے کی جارہی تیاریوں کا آج گگن گیر سونہ مرگ میں جائزہ لیا اور وہاں پر پولیس اور صوبائی انتظامیہ کے آفیسران کے ساتھ میٹنگ بھی کی۔

وزیر اعلیٰ عمر عبداللہ نے جوں ہی اپنے آفیشل ایکس اکاونٹ پر دورے کی تصاویر شیئر کی تو وزیر اعظم نریندر مودی نے بھی اس کے جواب میں لکھا کہ ’سونہ مرگ میں زڈ مورہ ٹنل کا افتتاح کرنے کے لئے دورے کا بے صبری سے انتظار کررہا ہوں۔‘

یہاں یہ امر قابل ذکر ہے کہ وزیر اعظم کے دورے کشمیر کے پیش نظر سونہ مرگ اور گگن گیر کو فوجی چھاونی میں تبدیل کیا گیا ہے۔

گگن گیر کے اوپری پہاڑی علاقوں میں بھی این ایس جی کمانڈوز کے ساتھ ساتھ فوج کی تعیناتی عمل میں لائی گئی ہے۔

سونہ مرگ ، گگن گیر اورکنگن تک 20کلومیٹر حدود علاقے کو سیکورٹی فورسز نے پوری طرح سے سیل کیا ہے اور ٹنل کے نزدیک کسی بھی عام شہری کو جانے کی اجازت نہیں دی جارہی ہیں۔

،،،،،،،،،،،،،،،،،،،،،،،،،،،،

وزیر اعظم کا دورہ کشمیر: وزیر اعلیٰ نے سونہ مرگ میں تیاریوں کا جائزہ لیا

سری نگر11جنوری(یو این آئی)جموں وکشمیر کے وزیر اعلیٰ عمر عبداللہ نے ہفتے کی سہ پہرگگن گیر سونہ مرگ کا دورہ کیا اور وہاں پر تیاریوں کا جائزہ لیا۔

اس موقع پر صوبائی کمشنر کشمیر اور پولیس کے اعلیٰ حکام نے وزیر اعلیٰ کو سیکورٹی انتظامات کے بارے میں جانکاری فراہم کی۔

اطلاعات کے مطابق وزیر اعلیٰ عمر عبداللہ نے گگن یر سونہ مرگ میں زڈ مورہ ٹنل کا دورہ کیا اور وہاں پر انتظامات کا بچشم جائزہ لیا۔

صوبائی کمشنر کشمیر نے وزیر اعلیٰ کو جانکاری فراہم کرتے ہوئے بتایا کہ وزیر اعظم کے دورے کے پیش نظر سیکورٹی کے غیر معمولی انتظامات کئے گئے ہیں۔

وزیر اعلیٰ عمر عبداللہ نے دورے کے بعد ایکس پر جانکاری فراہم کرتے ہوئے بتایا :’پیر کو وزیر اعظم نریندر مودی جی کے دورے کے پیش نظر تیاریوں کا جائزہ لینے کی خاطر سونہ مرگ کا دورہ کیا۔‘

انہوں نے کہاکہ زڈ مورہ ٹنل کے باعث اب سونہ مرگ سال بھر سیاحت کے لئے کھلا رہے گااور یہ کہ اس سیاحتی مقام کو اب بہترین سکی ریزاٹ کے طورپر تیار کیا جائے گا۔

وزیر اعلیٰ نے مزید کہا کہ زڈ مورہ ٹنل کی وجہ سے مقامی لوگوں کو یہاں سے اب کئی جانے کی ضرورت نہیں ۔ اوراب سری نگر سے کرگل جانے میں بھی کم وقت صرف ہوگا ۔

بتادیں کہ وزیرا عظم نریندر مودی 13جنوری کو زڈ مورہ ٹنل کا افتتاح کریں گے ۔ دورے کے پیش نظر سری نگر اور گاندربل میں سیکورٹی کے غیر معمولی انتظامات کئے گئے ہیں۔