مائسمہ اور فقیر گوجری میں آگ کی وارداتیں چار رہائشی مکان خاکستر

سرینگر،19نومبر

سری نگر کے مائسمہ اور فقیر گوجری علاقوں میں آتشزدگی کی وارداتوں میں چار مکانوں کو نقصان پہنچا ہے۔فائر اینڈ ایمرجنسی عملے کی بروقت کارروائی کے نتیجے میں آگ کو مزید پھیلنے سے روک دیا گیا۔

اطلاعات کے مطابق شہر سری نگر کے گنجان آبادی والے علاقے مائسمہ میں اتوار بارہ بجکر 43منٹ پر رہائشی مکان سے آگ نمودار ہوئی جس نے آناًفاناً اپنے متصل دو مکانوں کو لپیٹ میں لے لیا۔فائر اینڈ ایمرجنسی اور مقامی لوگوں کی بروقت کارروائی کے نتیجے میں گر چہ آگ پر قابو پایا گیاتاہم آتشزدگی کی اس واردات میں ایک مکان پوری طرح سے خاکستر ہوا جبکہ دو کو جزوی نقصان پہنچا ہے۔

فائر اینڈ ایمرجنسی محکمہ کے ایک سینئر عہدیدار نے یو این آئی اردو کو بتایا کہ سری نگر کے مائسمہ علاقے میں اتوار بارہ بجکر 43منٹ پر آگ نمودار ہونے کی اطلاع ملتے ہی فائر اینڈ ایمرجنسی عملے کے اہلکار جائے موقع پر پہنچے اور آگ بجھانے کی کارروائی شروع کی۔انہوں نے بتایا کہ دس فائر ٹینڈروں کی مدد سے آگ پر قابوپایا گیا تاہم آتشزدگی کی اس واردات میں ایک مکان خاکستر جبکہ دو کو جزوی نقصان پہنچا ہے۔

انہوں نے کہاکہ پولیس نے آگ لگنے کی وجوہات جاننے کی خاطر درج کرکے مزید تحقیقات شروع کی۔دریں اثنا سری نگر کے مضافاتی علاقے فقیر گوجری میں درمیانی شب رہائشی مکان سے آگ نمودار ہونے کی اطلاع ملتے ہی فائر اینڈ ایمرجنسی عملے کے اہلکار جائے موقع پر پہنچے۔معلوم ہوا ہے کہ دور افتادہ علاقے ہونے کے باوجود بھی تین فائر ٹینڈروں کی مدد سے آ گ پر قابو پایا گیا۔یو این آئی