سوپور پولیس نے منشیات کے ایک بڑے نیٹ ورک کا پردہ فاش کیا : ایس ایس پی

سرینگر،/19 جون

پولیس نے شمالی کشمیر کے سوپور میں منشیات فروش کے قبضے سے بڑی مقدار میں ممنوع نشیلی اشیائ برآمد کرنے کا دعویٰ کیا ہے۔ایس ایس پی سوپور شبیر نواب نے پیر کو ایک پریس کانفرنس کے دوران بتایا کہ منشیات کے خلاف اپنی جنگ جاری رکھتے ہوئے سوپور پولیس نے بھاری مقدار میں منشیات کی اشیاءبرآمد کی ہے۔
انہوں نے کہاکہ 10مئی کو سنگرامہ ہاوے کے نزدیک ناکہ چیکنگ کے دوران پولیس نے ایک گاڑی کو روک کر اس میں سوار منشیات فروش الطاف احمد صوفی ساکن خوشحال کالونی تیل بل کو حراست میں لیا۔

انہوں نے کہاکہ دوران پوچھ تاچھ منشیات فروش نے بتایا کہ سری نگر سے تعلق رکھنے والے شخص کی جانب سے شمالی کشمیر میں منشیات کی اشیاءپہنچائی جارہی ہیں۔پولیس نے اس ضمن میں ایف آئی آر زیر نمبر 44کے تحت کیس درج کرکے تحقیقات شروع کی۔
ایس ایس پی نے بتایا کہ کیس کی تحقیقات کو جاری رکھتے ہوئے پولیس نے 15جون کو واڈورہ پائین میں ناکہ چیکنگ کے دوران پرویز احمد بٹ ولد علی بٹ ساکن عمر آباد ایچ ایم ٹی سری نگر کو حراست میں لے کر اس کے قبضے سے ایک درجن نشہ آور بوتلیں برآمد کیں۔انہوں نے بتایا کہ پوچھ تاچھ کے دوران منکشف ہوا کہ پرویز دہلی ، پنجاب اور دوسری ریاستوں سے منشیات کی اشیاءکشمیر پہنچانے کا کام انجام دے رہا ہے۔
ان کے مطابق پرویز کے قبضے سے مزید 350بوتلیں برآمد کی گئیں۔ایس ایس پی نے کہاکہ سوپور پولیس نے منشیات کے ایک بڑے نیٹ ورک کا پردہ فاش کیا ہے۔انہوں نے کہاکہ پرویز نے منشیات کے کاروبار سے جڑے مزید افراد کے بارے میں جانکاری فراہم کی اور انہیں بھی بہت جلد سلاخوں کے پیچھے دھکیل دیا جائے گا۔دریں الناس پولیس نے عوام الناس سے اپیل کی ہے کہ وہ منشیات کا کاروبار کرنے والوں کے بارے میں قانون نافذ کرنے والے ادارے کو مطلع کرئے۔ یو این آئی