حکومت عوامی نقل و حمل کے نظام کو فروغ دینے کے لیے مختلف اقدامات کر رہی ہے۔ گڈکری

نئی دلی۔ 13؍ اپریل۔

صاف ستھرا ماحولیات مرکزی حکومت کی اولین ترجیح ہیں اور حکومت آلودگی کو روکنے کے لیے بہت سے آپشنز پر غور کر رہی ہے اور اسی کے مطابق جنگی بنیادوں پر مختلف پروجیکٹوں پر کام کر رہی ہے

۔مرکزی وزیر برائے روڈ ٹرانسپورٹ اور ہائی ویز، نتن گڈکری نے یہ بات کہی ہے ۔ وہ آج ممبئی میں بندرگاہوں، جہاز رانی اور لاجسٹکس سے متعلق 11ویں دو سالہ بین الاقوامی کانفرنس سے خطاب کر رہے تھے۔پبلک ٹرانسپورٹ کا نظام ملک کے لیے بہت اہم ہے۔

وزیر موصوف نے خیال ظاہر کیا کہ ملک میں فضائی آلودگی کا تقریباً 40 فیصد سڑکوں کی وجہ سے ہوتا ہے اور اس کے لیے ضروری ہے کہ ملک میں پبلک ٹرانسپورٹ کو فروغ دیا جائے۔ انہوں نے کہا کہ حکومت پبلک ٹرانسپورٹ کو فروغ دینے کے لیے مختلف اقدامات کر رہی ہے۔

انہوں نے ذکر کیا کہ ممبئی میں شروع کی گئی ڈبل ڈیکر بس اور بنگلور میں شروع کی جانے والی بس سروس ان اقدامات کی مثالیں ہیں۔ 260 روپ ویز اور کیبل کاروں کی منظوری بھی اسی کوشش کا ایک حصہ تھی اور تقریباً65 ہزار کروڑ روپے کے روڈ پروجیکٹس پردہلی اور اس کے آس پاس کام جاری ہے۔ انہوں نے کہا کہ اس کام کے مکمل ہونے کے بعد، اس سے خطے میں ٹریفک کی بھیڑ اور فضائی آلودگی کو کم کرنے میں مدد ملے گی۔اس کے علاوہ شری گڈکری نے کہا کہ مرکزی حکومت بھی الیکٹرک ہائی ویز یعنی ای ہائی ویز بنانے کی کوشش کر رہی ہے۔ وزیر نے بتایا کہ الیکٹرک بسیں، الیکٹرک کاریں،

الیکٹرک سکوٹر اب کام کر رہے ہیں لیکن اس کے ساتھ ساتھ ہم فلیکس انجن والی گاڑیوں کا استعمال شروع کر رہے ہیں۔ مرکزی وزیر نتن گڈکری نے دہرایا کہ ہائیڈروجن مستقبل کا ایندھن ہے۔ یہ بتاتے ہوئے کہ ممبئی میں ایندھن کے طور پر میتھانول کا استعمال کرتے ہوئے بسوں اور ٹرکوں کو چلانے میں کوئی مسئلہ نہیں ہے،

وزیر نے کہا کہ اس سے اخراجات بچیں گے اور آلودگی میں کمی آئے گی۔ اس موقع پر مرکزی وزیر نے اس یقین کا اظہار کیا کہ مرکزی حکومت کی کوششوں سے اگلے پانچ سالوں میں آلودگی کا مسئلہ کافی حد تک حل ہو جائے گا۔ممبئی گوا ہائی وے پروجیکٹ میں تاخیر پر افسوس کا اظہار کرتے ہوئے، انہوں نے کہا کہ کئی عوامل جیسے ٹھیکیداروں سے متعلق مسائل کے ساتھ ساتھ حصول اراضی میں مشکلات اس تاخیر کے لیے ذمہ دار ہیں۔ انہوں نے کہا کہ لیکن یہ تمام مسائل حل ہو چکے ہیں اور تقریباً 73 فیصد پراجیکٹ مکمل ہو چکا ہے۔ انہوں نے اس یقین کا بھی اظہار کیا کہ ممبئی گوا ہائی وے کا کام مقررہ وقت میں مکمل ہو جائے گا۔