برفباری برفباری کے بعد وادی میں معمولات بحال ،دھوپ نکلنے سے لوگوں نے لی راحت کی سانس

سرینگر/07جنوری:/ گزشتہ دنوں ہوئی بھاری برفباری نتیجے میں وادی میںمعمولات زندگی متاثر رہنے کے بعد جمعرات کودھوپ کھلنے سے معمولات زندگی بحال ہوگئی جبکہ صبح سے ہی شہرسرینگر سمیت وادی بھر میںمطلع صاف ہوا اور بادلوں کی اوٹ سے سورج نکل آیا جس کے نتیجے میں دن بھر دھوپ کھلنے سے لوگوں نے راحت کی سانس لی ہے ۔ اسی دوران وادی کا فضائی رابطہ بھی چار روز بعد بحال ہوا تاہم زمینی رابطہ ہنوز بند پڑا ہوا ہے ۔اس دوران محکمہ موسمیات نے اگرچہ وادی میںاگلے چند دنوں تک موسم خشک رہنے کی پیشن گوئی کی ہے تاہم شبانہ درجہ حرارت میں مزید گراوٹ آسکتی ہے۔ سی این آئی کے مطابق پیر پنچال کے آر پار مسلسل چار روز تک خراب موسمی صورتحال کے بعد جمعرات کی صبح سے ہی مطلع صاف دکھائی دیا اور بادلوں کی اوٹ سے سورج نکلنے سے اچھی خاصی دھوپ دن بھر کھل اُٹھی ۔ موسم میں بہتری کی وجہ سے اہلیان وادی نے راحت کی سانس لی ہے ۔ شہر سرینگر کے علاوہ وادی کے دیگر قصبہ جات میں دن بھر دھوپ کھلنے کے نتیجے میں معمولات زندگی بحال ہوگئی اور لوگوںنے اپنے کاموں کی طرف پھر دھیان دینا شروع کیا تاہم وادی بھر کی 50فیصدی سڑکیں ہنوز زیر برف ہے ۔برفباری کے بعد موسمی صورتحال میں بہتری آنے کے ساتھ ہی چار روز بعد وادی کشمیر کا فضائی رابطہ دیگر ریاستوں سے بحال ہوا تاہم زمینی رابطہ ہنوز بندپڑا ہوا اور بیشتر سڑکیں ابھی بھی برف سے ڈھکی ہوئی ہے ۔ اس دورن محکمہ موسمیات کی پیشن گوئی کے مطابق وادی میں اگرچہ اگلے چند روز تک موسم خشک رہنے کا امکان ہے تاہم شبانہ درجہ حرارت میں مزید کمی واقع ہوگی اور رات کا درجہ حرارت منفی 7ڈگری سیلیس تک چلا جاسکتا ہے ۔ یاد رہے کہ وادی میں موسم کی ابتر صورتحال کی وجہ سے اہل کشمیر کو سخت ترین مشکلات کا سامنا کرنا پڑرہا ہے ۔ ادھر محکمہ موسمیات کے مطابق وادی کشمیر کے بیشتر علاقوں میں رات کے درجہ حرارت میں کمی واقع ہوئی جس کے ساتھ ہی گلمرگ کم سے کم منفی 8.5 سیلشنس ریکارڈ کیا گیا۔ سرینگر میں منفی 0.8،پہلگام میں منفی 2.5 ڈگری ، قاضی گنڈ میں منفی 0.2 ، کپواڑہ میں منفی 1.7 جبکہ کوکرنگ میں منفی 1.0حرارت ریکارڈ کیا گیا۔