لاوے پورہ جھڑپ ـ:فورسز اور مہلوکین کے گھروالوں کا نقطہ نظر جان لیا ، حقائق’ مناسب وقت ‘پر دیں گے/ لیفٹنٹ گورنر

سرینگر/07جنوری: 30دسمبر کو لاوے پورہ سرینگر میں ہوئی جھڑپ کے بارے میں فورسز اور مہلوکین کے گھروالوں کا نقطہ نظر جان لیا ہے کی بات کرتے ہوئے جموں کشمیر کے لیفٹنٹ گورنر منوج سنہا نے کہا کہ جھڑپ سے متعلق تمام حقائق’ مناسب وقت ‘پر دیں گے۔اسی دوران انہوں نے کہا کہ جموں کشمیر کے دیگر اضلاع میں بھی 4جی انٹر نیٹ خدمات کی بحالی سے متعلق ’خوشخبری‘ عنقریب دی جائے گی۔ سی این آئی کے مطابق جموں میں ایک پریس کانفرنس کے دوران میڈیا نمائندوں کی جانب سے سرینگر جھڑپ کے بارے میں پوچھے گئے ایک سوال کے جواب میں جموں کشمیر کے لیفٹنٹ گورنر منوج سنہا نے کہا ’’میں آپ کو بتانا چاہتا ہوں کہ مرکز ی زیر انتظام جموں کشمیر ایک حساس علاقہ ہے۔انہوں نے کہا کہ میں نے لاوے پورہ جھڑپ کے بارے میں فورسز اور مہلوکین کے گھروالوں کا نقطہ نظر جان لیا ہے۔میں مناسب وقت پر حقائق سامنے لاوں گا‘‘۔قابل ذکر بات یہ ہے کہ 30دسمبر کو لاوے پورہ سرینگر میں پولیس کے مطابق تین جنگجو فورسز کے ساتھ معرکہ آرائی میں جاں بحق ہوگئے جن کا تعلق جنوبی اضلاع پلوامہ اور شوپیان سے تھا۔ مہلوکین کے گھروالوں نے تاہم الزام عائد کیا ہے کہ اْن کے بچے جنگجو نہیں بلکہ عام شہری تھے اور اْنہیں بقول انکے ایک فرضی معرکہ آرائی میں جاں بحق کیا گیا ہے۔ اسی دوران انہوں لیفٹنٹ گورنر منوج سنہا نے کہا کہ 4Gانٹر نیٹ سروس کی بحالی کے بارے میں’خوشخبری‘ عنقریب دی جائے گی۔ پریس کانفرنس کے دوران نامہ نگاروں کے سوال کا جواب دیتے ہوئے لیفٹنٹ گورنر منوج سنہا نے کہا ’’میں جانتا ہوں کہ 4جی انٹر نیٹ سروس صرف دو اضلاع میں چل رہی ہے۔اس کے بارے میں ایک کمیٹی معاملے کو دیکھ رہی ہے۔اْمید ہے کہ آنے والے دنوں میں خوشخبری ملے گی‘‘۔ یہ بات قابل امر ہے کہ جموں کشمیر میں ڈیڑھ سال سے زائد عرصہ سے تیز رفتار انٹر نیٹ خدمات بند پڑی ہوئی ہے اور کچھ دنوں قبل اس بات کی قیاس آرائیاں ہو رہی تھی کہ جموں کشمیر میں سال نو پر تیز رفتار انٹر نیٹ خدمات بحال کی جائے گی تاہم ایسا بھی تک نہیں کیا گیا ۔