خشک موسم کے چلتے شبانہ درجہ حرارت میں کمی کے باعث وادی میں سردی کی شدید لہر جاری

آج سے کشمیر اور زوجیلا کے علاقوں میں ہلکی بارشوں اور برفباری کا امکان / محکمہ موسمیات

سرینگر/03دسمبر: وادی میں شدید سردی کی لہر جاری رہنے کے بعد محکمہ موسمیات نے جمعہ سے کشمیر اور زوجیلا میں ہلکی بارشوں اور برفباری کی پیشن گوئی کی ہے ۔ اس دوران سرینگر میں رات کا درجہ حرارت منفی 1.4جبکہ لہہ میں درجہ حرار ت منفی 10.5ڈگری تک پہنچ گیا ہے ۔ادھر شدید سردی کی وجہ سے لوگوں کو شدید مشکلات کا سامنا کرنا پڑرہا ہے ۔سی این آئی کے مطابق رواں ماہ کے ابتدائی دنوں سے وادی میں شدت کی سردی جاری ہے جبکہ موسم ناسازگار رہنے کے دوران گذشتہ کئی دنوں سے اگرچہ شہر سرینگر اور دیگر قصبہ جات میں موسم خشک رہا اور دن میں ہلکی دھوپ نکلی تھی تاہم جمعرات کی صبح سے ہی ایک بار پھر مطلع ابرآلود رہا جس کی وجہ سے سردی کی شدت میں مزید اضافہ دیکھنے کو ملا ۔ اس دوران محکمہ موسمیات نے اطلاع دی ہے کہ اگلے چند دنوں تک وادی میں مطلع ابرآلود رہنے کی وجہ سے سردی کی شدت میں اضافہ دیکھنے کو مل سکتا ہے جبکہ آج یعنی جمعہ کی صبح سے ہی کشمیر میں موسمی صورتحال میں تبدیلی آنے کا امکان ہے اور بارشیں اور برفباری ہو سکتی ہے ۔ محکمہ موسمیات کے مطابق جمعہ کی صبح سے وادی کشمیر اور زوجیلا کے علاقوں میں ہلکی برفباری ہونے کے امکانات ہے ۔ اسی دوران محکمہ موسمیات کے مطابق سرینگر میں شبانہ درجہ حرارت منفی 1.4جبکہ پہلگام میں رات کا کم سے کم درجہ حرارت منفی 3.8ڈگری رہا اس کے ساتھ ساتھ گلمرگ میں بھی رات کا کم سے کم درجہ حرارت منفی 2.5ڈگری ریکارڈ کیا گیا ہے ۔ کرگل میں رات کا کم سے کم درجہ حرارت منفی 5.6ڈگری سیلسیس ریکارڈ کیا گیا ۔اسی طرح لہہ میں منفی 10ڈگری رہاہ ۔ ادھر سرمائی راجدھانی جموں میں رات کا کم سے کم درجہ حرارت 13.5کٹرہ میں 14.6، بٹوت میں 9.6بانہال میں 7.2اوربھدرواہ میں 6.2ڈگری سیلسیس ریکارڈ کیا گیا ہے ۔ وادی میں سردی کی شید لہرجاری رہنے کے نتیجے میںلوگوں کو شدید پریشانیوں کا سامنا کرناپڑرہا ہے ۔ عام لوگوں کے علاوہ بچوں اور ضعیف العمر افراد کو گھروں سے باہر نکلنے میں بھی مشکلات کا سامنا کرنا پڑرہا ہے ۔ چھوٹے بچے اور بزرگ سردی کی شدت کی وجہ سے اپنے ہی گھروں میں مقید ہوکے رہ گئی۔ جبکہ بزرگوں کو سردی کی وجہ سے ہڑیوں اور جوڑوں میں درد میں اضافہ ہوا ہے ۔خیال رہے کہ وادی کشمیر میں چلہ کلان کی آمد سے قبل ہی شدید سردی کے لہر کے باعث اہلیان وادی کو کافی مشکلات کا سامنا ہے جبکہ رات کے دوران درجہ حرارت منفی ریکارڈ ہونے کے باعث لوگ شدید ٹھنڈ کے چلتے بہت سارے پریشانیوں میں مبتلا ہو چکے ہیں ۔