کشمیر سے ڈومیسائل اسناد کی اجرائی ناقابل قبول؛اقوام متحدہ کے سیکرٹری جنرل سے رابطہ کیاگیا / عمران خان

سرینگر/30جون/سی این آئی// پاکستان کے وزیراعظم عمران خان کا کہنا ہے کہ کشمیر سے 25 ہزار کو ڈومیسائل کا اجرا ناقابل قبول ہے اور بھارت کو روکنا بھی ضروری ہے۔سی این آئی مانیٹرنگ کے مطابق سماجی رابطے کی سائٹ ٹوئٹر پر پاکستان کے وزیراعظم عمران خان کا کہنا تھا کہ پہلے جموں و کشمیر پرغیر قانونی قبضہ جمانے کی بھارتی کوشش اور اب 25 ہزار ہندوستانی شہریوں کو ڈومیسائل سرٹیفکیٹس کے اجراء سمیت وادی میں آبادی کا تناسب بدلنے کے تمام بھارتی حربے سراسر غیرقانونی اور چوتھے جینیوا کنونشن سمیت بین الاقوامی قانون اور سلامتی کونسل کی قراردادوں کے منافی ہیں۔میں نے اقوام متحدہ کے سیکرٹری جنرل سے رابطہ کیا ہے اور میں دیگرعالمی رہنماؤں سے بھی بات کررہا ہوں، اس ناقابلِ قبول سمت میں بھارت کی پیش قدمی روکنا ضروری ہے کہ اس سے اہلِ کشمیر کے قانونی اور بین الاقوامی طور پر ضمانت شدہ حقوق پر مزید زد پڑتی ہے اور جنوبی ایشیاء میں امن و سلامتی کو شدید صدمہ پہنچتا ہے۔