کورنا وائرس کے لاک ڈائون کے بعد پاکستان کا سکھ یاتریوں کیلئے گوردوارہ کرتارپور صاحب دوبارہ کھولنے کا اعلان

سرینگر/27جون؛ کورونا وبا کے پیش نظر پاکستان اور بھارت کے درمیان زمینی سرحدیں مکمل طور پر بند ہونے کے بیچ پاکستان نے سکھوں کے مقدس مقام گوردوارہ کرتارپور صاحب دوبارہ کھولنے کا اعلان کردیا۔سی این آئی مانیٹرنگ کے مطابق پاکستان کے وزیر خارجہ شاہ محمود قریشی مائیکروبلاگنگ ویب سائیٹ ٹویٹر پر اپنے بیان میں کہا ہے کہ دنیا بھرمیں جیسے عبادت گاہیں کھل رہی ہیں،پاکستان کرتارپور راہدری کھولنیکی تیاری کر رہا ہے، ہم بھارت کو 29 جون کو کرتار پور راہداری کھولنے سے متعلق اپنی آمادگی سے آگاہ کر رہے ہیں، مہاراجہ رنجیت سنگھ کی برسی پر راہداری کھولنے کو تیارہیں۔اس سے پہلے یہ کوریڈور 16 مارچ کو کوڈ 19 واقعات کی بڑھتی ہوئی تعداد کی وجہ سے عارضی طور پر بند کردیا گیا تھا۔ اس بات کو یقینی بنانے کے لئے کہ ضروری احتیاطی تدابیر اختیار کی جائیں ، پاکستان نے ہندوستان کو دوبارہ کھولنے کے لئے معیاری آپریٹنگ طریقہ کار (ایس او پیز) پر تبادلہ خیال کرنے کی دعوت دی ہے۔کرتار پور راہداری کا افتتاح پاکستان کے وزیر اعظم عمران خان نے 9 نومبر 2019 کو کیا تھا۔ بابا گورو نانک کی 550 ویں یوم پیدائش کے موقع پر راہداری کا افتتاح دنیا بھرمیں بسنے والے سکھوں کے طویل انتظارکی خواہش پرکیاگیا تھا، کرتار پور راہداری امن اور مذہبی ہم آہنگی کی علامت ہے۔ حکومت کے اس اقدام کو پوری دنیا میں سراہا گیا تھا، سکھ مذہب کے پہلے گورو بابا گورو نانک نے اپنی زندگی کے آخری 18 سال کرتار پور میں گزارے تھے۔