آرونی بجبہاڑہ کے بعد اونتی پورہ میں سحری کے وقت مسلح تصادم آرائی

سرینگر/25اپریل: لاک ڈائون کے بیچ وادی کشمیر میں ماہ رمضان کی شروعات بھی مسلح خونین معرکہ آرائی سے ہوا جس دوران جنوبی قصبہ اونتی پورہ کے گوری پورہ علاقہ میں مسلح تصادم آرائی میں دو جنگجو اور ان کا ’’معاون ساتھی‘‘ جاں بحق ہو گیا ۔ پولیس نے جھڑپ کی تصدیق کرتے ہوئے بتایا کہ جاں بحق جنگجو سے بھاری مقدار میں اسلحہ و گولہ بارود بھی ضبط کیا گیا ۔ قابل امر ہے کہ گوری پورہ جھڑپ سے کچھ گھنٹوں قبل جنوبی کشمیر کے ہی آرونی بجبہاڑہ میں بھی معرکہ آرائی کے دوران دو جنگجوجاں بحق ہو گئے تھے ۔ سی این آئی کو دفاعی ذرائع سے معلوم ہوا ہے کہ گوری پورہ بارسو اونتی پورہ علاقے میں جنگجوئوں کی موجودگی کی اطلاع ملنے کے بعد فوج کے 55آر آر ، ایس او جی اونتی پورہ اور پولیس نے مشترکہ طور پر علاقے کو محاصرے میں لیکر تلاشی کارورائی شروع کر دی ۔ ذرائع سے معلوم ہوا ہے کہ سحری کے وقت علاقہ اس وقت گولیوں کی گن گرج سے لرز اٹھا جب نزدیکی باغات میں ایک کمین گاہ میں چھپے بیٹھے جنگجوئوں نے فرار ہونے کی کوشش کی اور فورسز پر اندھا دھند فائرنگ کی ۔ جس کے ساتھ ہی فوج و فورسز نے بھی مورچہ زن ہوکر جوابی کارورائی کی اور علاقے میں با ضابطہ طور جھڑپ کا آغاز ہو گیا ۔ ذرائع سے معلوم ہوا ہے کہ ابتدائی فائرنگ کے ساتھ ہی علاقے کو پوری طرح سے سیل کر دیا گیا اور فوج کی مزید کمک طلب کی گئی ۔ احتجاجی مظاہروں کے پیش نظر فوج نے علاقے کی طرف جانے والے تمام اہم راستوں کو سیل کر دیا اور ساتھ ہی جنگجوئوں کے خلاف فیصلہ کن کارروائی شروع کی ۔ معلوم ہوا ہے کہ گولیوں کی گن گرج سے پورا علاقہ لرزاٹھا ۔ اور طرفین کے مابین گولیوں کا تبادلہ کچھ وقت تک جاری رہا ۔ذرائع سے معلوم ہوا ہے کہ علاقے میں طرفین کے مابین جھڑپ کے بعد جونہی گولیوں کا تبادلہ تھم گیا تو فورسز نے جھڑپ کے مقام پر تین نعشیں بر آمد کی جن میں سے دو کے بارے میں بتایا جاتا ہے کہ وہ سرگرم جنگجو تھے جبکہ تیسرا جنگجوئوں کا معاون ساتھی تھا ۔ جاں بحق جنگجوئوں کے قبضے سے بھاری مقداد میں اسلحہ و گولہ بارود بھی ضبط کیا گیا ہے ۔ پولیس کے ایک سنیئر افسر نے جھڑپ میں دو جنگجوئوں اور ان کے معاون ساتھی کی ہلاکت کی تصدیق کرتے ہوئے بتایا کہ جھڑپ میں جاں بحق جنگجوئوں سے بھاری مقدار میں اسلحہ و گولی بارود ضبط کیا گیا ہے ۔ جھڑپ کے ساتھ ہی اونتی پورہ اور اس کے ملحقہ علاقوں میں موبائیل انٹر نیٹ خدمات بند کی گئی جبکہ حساس مقاما ت پر سخت ترین بندشیں عائد کی گئی۔خیال رہے کہ اس سے قبل جمعہ کی شام دیر گئے آر ونی بجبہاڑہ میں اس وقت مسلح تصادم آرائی ہوئی جب جنگجوئوں نے شر پورہ علاقہ سے ایک پولیس اہلکار کو اغوا کر لیا تھا جس کے بعد فورسز نے ایمبوش لکا کر جنگجوئوں کا تعاقب کیا اور دونوں جنگجوئوں مختصر جھڑپ میں جاں بحق ہو گئے جبکہ پولیس اہلکار کو باز یاب کیا گیا ۔ادھر خبر رساں ایجنسی جی این ایس نے آئی جی پی کشمیر، وجے کمار کا حوالہ دیتے ہوئے لکھا کہ اس آپریشن میں دو جنگجو اور اْن کا ایک’’ ساتھی‘‘ جاں بحق ہوگئے۔پولیس نے تاہم مہلوکین کی شناخت نہیں کی۔ (سی این آئی )