جموں کشمیر میں مزید 8مریضوں کے ٹیسٹ کورنا وائرس کیلئے مثبت ، تعداد 70تک پہنچ گئی

حکم امتناعی کی خلاف ورزی کرنے والوں کیخلاف پولیس کا رویہ سخت ، درجنوں گاڑیاں ضبط ، سینکڑوں افراد کیخلاف کیس درج

سرینگر/02اپریل/سی این آئی// جموں کشمیر میں کورنا وائر س کے بڑھتے پھیلائو کے بیچ مزید 8افراد کے ٹیسٹ مثبت آنے کے ساتھ ہی جموں کشمیر میں مریضوں کی تعداد 70تک پہنچ گئی ہے جن میں سے کشمیر میں 53جبکہ جموں سے 17تعلق رکھتے ہیں ۔ادھر لاک ڈاون تیسرے ہفتے میںداخل ہوگیا ہے جس کے نتیجے میں وادی کشمیر میںمعمولات زندگی بُری طرح سے متاثر ہوئی ہے جبکہ گذشتہ سات روز سے بند سرینگر جموں شاہراہ کے نتیجے میں وادی میں اشیاء ضروریہ کی شدید قلت پیدا ہوئی ہے ۔ ادھر کورناوئرس کے کیسوںمیں مسلسل اضافہ ہونے کے نتیجے میں اہلیان وادی میں سخت تشویش دور گئی ہے اور لوگوں میں سخت خوف و ہراس پھیل گیا ہے ۔ اس دوران انتظامیہ کی جانب سے بندشوں میں مزید سختی برتی جارہی ہے اور حکم امتناعی کی خلاف ورزی کرنے والوں سے سختی سے نمٹا جارہا ہے ۔اور درجنوں افراد کے خلاف روزانہ کیس دائر کیا جارہا ہے ۔ کرنٹ نیوز آف انڈیا کے مطابق جمعرات کو جموں کشمیر انتظامیہ کی جانب سے جاری کردہ کورنا وائرس کے میڈیا بولٹین میں بتایا گیا کہ جمعرات کو مزید 8مریضوں کے کیس مثبت آنے کے ساتھ ہی جموں کشمیر میںمریضوں کی تعداد 70پہنچ گئی ۔ جموں کشمیر انتظامیہ کے مطابق ان 70مریضوں میں 17جموں جبکہ 53کشمیر سے تعلق رکھتے ہیں ۔ ادھر عالمی وبائی کوروناوائرس کے تیزی کے ساتھ پھیلائو کی وجہ سے ملک بھر کے ساتھ ساتھ وادی کشمیر میں بھی گذشتہ پندرہ روز سے مکمل لاک ڈاون جاری ہے جس کے نتیجے میں معمولات زندگی درہم برہم ہے ۔ کورونا وائرس کے پھیلاؤ کی رفتار تیز گام ہونے کے پیش نظر وادی کشمیر میں جہاں جمعرات کو مسلسل 15 ویں روز بھی سخت لاک ڈاؤن جاری رہا وہیں لوگوں میں بھی خوف وتشویش لہر بھی جاری ہے اور لوگوں میں سخت خوف و ہراس پھیل گیا ہے ۔ جبکہ سرینگرجموں شاہراہ مسلسل بند رہنے کے نتیجے میں وادی میں اشیاء ضروریہ کی قلت پیدا ہوئی ہے ۔ لاک ڈاون کا ناجائز فائدہ اُٹھانے والوں نے عام لوگوں کا خون چوسنا شروع کیا ہے جن کے خلاف انتظامیہ کارروائی کرنے سے قاصر ہے ۔ لاک ڈاون جاری رہنے کے باوجود بھی وادی میں کوروناوائرس کے کیسوں میں مسلسل اضافہ ہوتا جارہا ہے ۔ انتظامیہ نے کورونا وائرس پر قابو پانے کے لئے درجنوں ان علاقوں، جن سے وائرس کے مصدقہ یا مشتبہ کیسز سامنے آئے ہیں، کو ‘ریڈ زون’ قرار دے کر مکمل سیل کیا ہے اور ان علاقوں کے لوگوں کو اپنے ہی گھروں میں قرنطینہ میں رکھا گیا ہے۔جبکہ پابندی کو مزید سخت کردیا گیا ہے اس کے ساتھ ساتھ کوروناوائرس کو پھیلنے سے بچنے کیلئے حکم امتناعی کی خلاف ورزی کرنے والوں کے خلاف بھی انتظامیہ اور پولیس کی جانب سے کارروائیاں انجام دے رہے ہیں۔