کورنا وائرس کے دو کیس مثبت آنے کے بعد شوپیان کے دو دیہات حساس قرار

سرینگر/30مارچ/سی این آئی// پہاڑی ضلع شوپیان میں کورنا وائرس کے دو کیسز سامنے آنے کے بعد دو دیہات کا ریڈ زون قرار دیا گیا ہے ۔ ادھر ضلع پلوامہ کے مختلف علاقوں میں بھی ٹریفک کی نقل و حمل پر مکمل طور پابندی عائد کی گئی ہے ۔ سی این آئی کے مطابق شوپیان کے دو افراد کے ٹیسٹ کورنا وائرس کیلئے مثبت آنے کے بعد ضلع انتظامیہ شوپیان نے دو دیہات کا ریڈ زون قرار دیکر وہاں نقل و حمل پر مکمل طور پابندی عائد کر دی ۔ نمائندے نے شوپیان سے اطلاع دی ہے کہ ضلع شوپیان میں کورنا وائرس کے دو کیس مثبت آنے کے بعد ضلع انتظامیہ شوپیان نے سدھو ، رام نگری اور اس کے ملحقہ علاقوں کو ریڈ زون قرار دیا ہے اور ان علاقوں کی جانب سے لوگوں کو جانے سے گریز کرنے کیلئے کہا گیا ۔ ضلع انتظامیہ کے ایک افسر نے اس کی تصدیق کرتے ہوئے بتایا کہ علاقے میں دو مریضوں کے ٹیسٹ کورنا وائرس کیلئے مثبت آنے کے بعد ضلع انتظامیہ شوپیان نے دو دیہات کا حساس قرار دیا اور اس بات کا خیال رکھا جا رہا ہے کہ کورنا وائرس کو مزید پھیلنے سے روک لیا جائے ۔ انہوں نے بتایا کہ ان دیہات میں ہر قسم کی گاڑیوں کی نقل و حمل پر مکمل پابندی عائد رہے گی جبکہ لوگوں کو بھی گھروں سے غیر ضروری طور نکلنے کی اجازت نہیں دی جائے گی ۔ انہوں نے بتایا کہ ضلع ترقیاتی کمشنر شوپیان نے افسران کو ہدایت دی ہے کہ وہ ان علاقوں میں اشیائے ضروریہ اور دیگر چیزوں کی سپلائی کو یقینی بنائیں جبکہ واضح کر دیا کہ کسی کو بھی سرکار ی احکامات نظر انداز کرنے کی اجازت نہیں دی جائے گئی ۔ ادھر جنوبی ضلع پلوامہ میں بھی ضلع انتظامیہ کی جانب سے کئی علاقوں کو حساس قرار دینے کے بعد گاڑیوں کی نقل و حمل پر مکمل طور پابندی عائد کر دی ہے ۔ ضلع ترقیاتی کمشنر پلوامہ کی جانب سے جاری کردہ احکامات کے مطابق کورنا وائرس کے پیش نظر کئی علاقوں میں گاڑیوں اور عوام کی نقل حمل پر مکمل طور پابندی عائد کر دی گئی ہے ۔