اٹلی میں کرونا سے ہلاکتوں کا ایک دن میں نیا ریکارڈ قائم، 800 افراد کی زندگی کا چراغ گل

سرینگر/22مارچ/سی این آئی// کورونا وائرس کے تیزی سے پھیلائو کے چلتے اٹلی میں روزانہ اموات کی شرح میں اضافہ ریکارڈ ہورہا ہے گذشتہ ایک ہفتے سے روزانہ کی بنیاد پر ہونے والی ہلاکتوں میں گذشتہ روز غیرمعمولی اضافہ دیکھا گیا اور گذشتہ روز 8 سو افراد اس موذی بیماری کی بھینٹ چڑھ گئے۔سی این آئی مانیٹرنگ کے مطابق اٹلی میں شہری تحفظ کے ادارے کے سربراہ اینجلو بوریلی نے بتایا تھا کہ ایک روز 627 افراد کرونا کے باعث موت سے ہمکنار ہوئے جبکہ گذشتہ روز ہونے والی ہلاکتوں نے پچھلے تمام ریکارڈ توڑ ڈالے۔ اٹلی میں اب تک چھ ہزار 557 افراد کرونا کے باعث ہلاک ہوچکے ہیں۔اس کے علاوہ حکام نے وضاحت کی کہ مرنے والے زیادہ تر افراد اس وائرس سے متاثر ہونے سے پہلے ہی دل یا ذیابیطس جیسی بیماریوں میں مبتلا تھے۔ اٹلی میں کرونا کے باعث پوری دنیا میں سب سے زیادہ جانی نقصان ہوا ہے۔فرانسیسی خبررساں ادارے ‘اے ایف پی’ نے سرکاری اعدادو شمار میں بتایا ہے کہ کرونا سے ہونے والی ہلاکتوں کی تعداد 12 ہزار سے زائد ہوگئی ہے۔ اب تک 12 ہزار 592 افراد ہلاک ہوچکے ہیں۔ ان میں 7199 یورپ اور 3459 ایشیا میں ہوئی ہیں۔ اٹلی میں 4855، چین میں 3255 اور ایران میں 1556 افراد ہلاک ہوچکے ہیں۔( سی این آئی )