مٹھی بھر افراد کی طرف سے فضاء کو آلودہ کر نا انتہائی تشویش اور قابل افسوس /ڈاکٹر فاروق عبداللہ

یاست کے تینوں خطوں کے آپسی بھائی چارہ اور خصوصی پوزیشن کو قائم و دائم رہیگی

سرینگر: تاریخ گواہ ہے کہ نیشنل کانفرنس ریاستی عوام کے اعتبار،رفاقت اور اشتراک سے ہر امتحان میں سرخرو ہو کر سامنے آئی ہے اور ریاستی عوامی نے اپنی اس آبائی جماعت کو ہر وقت اپنے دلوں میں سمائے رکھا اور ہر حال میں شیر کشمیر کی اس تنظیم کو بھر پور اعتماد دیا کی بات کرتے ہوئے صدرِ جموں وکشمیر نیشنل کانفرنس ڈاکٹر فاروق عبداللہ نے کہا ہے کہ اس وقت ہمیں جس امتحان کاسامنا ہے ، اللہ کے فضل و کرم ہم اس میں بھی کامیاب ہوجائیں گے اور ریاست کے تینوں خطوں کے آپسی بھائی چارے، مذہبی ہم آہنگی، عزت و آبرو اور خصوصی پوزیشن کو قائم و دائم رہے گی۔سی این آئی کے مطابق ان باتوں کا اظہار انہوں نے آج ایک اپنی رہائش گاہ پر ایک تقریب پر کیا۔ اس تقریب کا انعقاد ریاست کے سابق چیف سکریٹری، سابق ایم ایل سی اور سابق وزیر شری بی آر کنڈل کی نیشنل کانفرنس میں شمولیت اختیار کرنے کیلئے منعقد کی گئی تھی۔پارٹی کے سینئر لیڈران ڈاکٹر شیخ مصطفےٰ کمال، محمد شفیع اوڑی، عبدالرحیم راتھر، دیوندر سنگھ رانا، میاں الطاف احمد، ایس ایس سلاتیہ، اجھے سدھوترا، سجاد کچلو، اعجاز جان، عبدالغنی ملک اور مرزا عبدالرشیدکے علاوہ کئی عہدیداران موجود تھے۔بی آر کنڈل کا پارٹی میں خیر مقدم کرتے ہوئے ڈاکٹر فاروق عبداللہ نے کہا کہ کنڈل صاحب نے انتظامیہ میں کلیدی عہدوں پر رہ کر ریاست کے لوگوں کی بے لوث خدمت کی ہے اور انہوں نے اپنی صلاحیوں کا لوہا منوایا ہے۔ مجھے اُمید ہے کہ نیشنل کانفرنس میں رہ کو وہ لوگوں کی اور خدمت کریں گے اور پارٹی کی مضبوطی کیلئے بھی کام کریں گے۔ ڈاکٹر فاروق عبداللہ نے کہا کہ مجھے یہ بات کہنے میں ذرا بھی ہچکچاہٹ محسوس نہیں ہوتی کہ نیشنل کانفرنس ریاست جموں و کشمیر کی واحد ایسی سیاسی اور عوامی نمائندہ جماعت ہے جس کی جڑیں اسی ریاست میں پیوست ہے اور یہی وہ جماعت ہے جو کشمیر دشمن عناصر کے ناپاک ارادوں کو خاک میں ملاسکتی ہے۔انہوں نے کہا کہ یہ نیشنل کانفرنس آج بھی عوام کے دلوں میں بستی ہے ، جو وقت نے بار بار ثابت کر کے دکھایا۔ ریاست جموں کشمیر میں کوئی دوسری جماعت نیشنل کانفرنس کی ثانی نہیں ہوسکتی ہے کیونکہ اسی تنظیم کے قائدین نے عوام کو شخصی نظام سے نجات دلانے اور بنیادی حقوق دلانے کیلئے زبردست جنگ لڑی ہے اور سالہا سال تک قید خانوں میں صعوبتیں جھیل کر ایک تاریخ رقم کی ہے۔ ڈاکٹر فاروق عبداللہ نے کہا کہ مٹھی بھر افراد نے جس طرح سے فضاء کو آلودہ کر رکھا ہے وہ انتہائی تشویش اور قابل افسوس ہے۔ جموں کے عوام نے کبھی بھی ان شرپسند عناصر کا ساتھ نہیں دیا ہے۔ انہوں نے جموں کے عوام سے اپیل کی کہ وہ امن کو پنپنے کا موقع فراہم کریں اور شرپسند عناصر کے عزائم کو کسی بھی صورت میں کامیاب نہ ہونے دیں۔