انتخابات9 مرحلوں میں منعقد ہوں گے۔ضابطہ اخلاق لاگو
سرینگر22 اکتوبر: چیف الیکٹورل افسر شالین کابرا نے ریاست میں پنچائت انتخابات کے لئے شیڈول کا اعلان کیا ہے۔سرینگر میں ایک پریس کانفرنس میں سی ای او نے بتایا کہ انتخابات17 نومبر سے11 دسمبر تک4483 پنچائت حلقوں میں9 مرحلوں میں کرائے جائیں گے۔انہوں نے کہا کہ ریاست میں یہ انتخابات10 سال کی مدت کے بعد منعقد کئے جارہے ہیں۔سی ای او نے کہا کہ انتخابات کے اعلان سے ضابطہ اخلاق لاگو ہوگیا ہے۔
سی ای او نے کہا کہ انتخابات صُبح8 بجے سے دوپہر2 بجے تک بیلٹ کے ذریعے کرائے جائیں گے۔ انہوں نے کہا کہ پنچائتی قوانین میں حالیہ ترامیم سے ووٹر پنچ اور سرپنچ دونوں کے لئے ووٹ ڈال سکتے ہیں جن کے لئے انہیں2 الگ الگ رنگوں پر مشتمل بیلٹ پیپر فراہم کئے جائیں گے۔
انہوں نے کہا کہ ہر ایک پنچائت حلقے کے لئے معقول تعداد میں پولنگ سٹیشن نامزد کئے گئے ہیں جن میں تقریباً5854208 رائے دہندگان اپنی حق رائے دہی کے استعمال کے اہل ہوں گے۔ان میں کشمیر صوبے میں2991128 اور جموں صوبے میں2863080 ووٹر شامل ہیں۔
انہوں نے کہا کہ ووٹروں کو ووٹر سلپ اُردو اور انگریزی زبانوں میں دستیاب کی جائیں گی اور ووٹر شناختی کارڈ ووٹ ڈالنے کے لئے لازمی ہوگا۔
سی ای او نے کہا کہ انتخابات کے احسن انعقاد کو یقینی بنانے کے لئے جنرل آبزرور تعینات کئے جائیں گے جبکہ مائیگرینٹ کشمیر پنڈتوں کو پوسٹل بیلٹ کے ذریعے ووٹ ڈالنے کے لئے ایک سکیم تشکیل دی گئی ہے۔انہوں نے کہا کہ نوٹیفکیشن23 ،26 اور29 اکتوبر اور یکم ،3 ،6 ،12 اور14 نومبر کو مشتہر کی جائے گی۔
انتخابات کے لئے نامزدگیاں داخل کرنے کی آخری تاریخ2 ،5 ،8 ،10 ،13 ،16 ،19 اکتوبر اور22 نومبر مقرر کی گئی ہے جبکہ31 اکتوبر،6 ،9 ،12 ،14 ،17 ،20 اور24 نومبر کو کاغذات کی جانچ پڑتال ہوگی۔ نامزدگیاں واپس لینے کی آخری تاریخ2 ،5 ،8 ،12 ،14 ،16 ،19 ،22 اور26 نومبر طے کی گئی ہے۔
Comments are closed.