محض کچھ وقت کی بارشوں سے شہر سرینگر کی سڑکیں جھیل میں تبدیل

سرینگر شہر کے مختلف علاقوں میں محض ایک گھنٹے تک جاری رہنے والی موسلا دھار بارش کے باعث سڑکیں زیر آب آئی جس کے نتیجے میں ٹریفک کی روانی متاثر ہوئی اور عوام کو شدید مشکلات کا سامنا کرنا پڑا۔

سٹی رپورٹر کے مطابق سرینگر کے خانیار، بابا ڈیمب، نوہٹہ، باغِ مہتاب، موچھو اور حبہ کدل سمیت کئی علاقوں میں سڑکوں پر بارش کا پانی جمع ہوگیا، جبکہ وسطی کشمیر کے ضلع بڈگام کے چاڈورہ علاقے میں بھی صورتحال ایسی ہی کچھ رپورٹ ہوئی ۔ عینی شاہدین کے مطابق متعدد سڑکیں جھیل جیسا منظر پیش کر رہی تھیں، جہاں گاڑیاں اور آٹو رکشے پانی میں جزوی طور پر ڈوب گئے۔

کئی مقامات پر گاڑیوں کی آمد و رفت متاثر ہوئی اور مسافروں کو متبادل راستے اختیار کرنے پڑے۔سوشل میڈیا پر وائرل ہونے والی ویڈیوں میں مختلف علاقوں کی سڑکیں ندی نالوں کا منظر پیش کرتی دکھائی دیں، جبکہ کئی گاڑیاں پانی میں پھنس گئی تھیں اور راہگیر گندے پانی سے گزرنے پر مجبور تھے۔اس صورتحال پر انتظامیہ خاص طو رپر سمارٹ سٹی حکام پر سوالات کھڑا کرتے مقامی لوگوں نے نکاسی آ ب کے نظام پر سوالات اٹھاتے ہوئے کہا کہ ہر بارش کے بعد یہی صورتحال پیدا ہوجاتی ہے۔