جعلی سرٹیفکیٹ گھوٹالہ :کرائم برانچ کشمیر نے 2 افراد کے خلاف مقدمہ درج کر لیا

کرائم برانچ جموں و کشمیر کے اقتصادی جرائم ونگ کشمیر نے جعلی سرٹیفکیٹس کی بنیاد پر سکمز صورہ سرینگر میں ایم بی بی ایس کورسمیں داخلہ حاصل کرنے میں مبینہ طور پر ملوث ہونے کے الزام میں دو افراد کے خلاف باقاعدہ مقدمہ درج کیا ہے۔

ایک بیان میں سی بی کے نے کہا کہ یہ کیس ایک معتبر ذریعہ سے موصول ہونے والی معلومات پر مبنی ہے، جس میں یہ الزام لگایا گیا تھا کہ اجس، بانڈی پورہ کے ایک رہائشی نے جعلی ”پرسن ود ڈس ایبلٹی“ (PWD) اور ”معاشی طور پر کمزور طبقہ“(EWS) سرٹیفکیٹ یا ذہنی طور پر ناکارہ ہونے کے باوجود ایم بی بی ایس پروگرام میں داخلہ حاصل کیا۔ معلومات پر عمل کرتے ہوئے، اقتصادی جرائم ونگ، سری نگر نے اس معاملے کی ابتدائی جانچ شروع کی۔

بیان میں کہا گیا کہ تصدیق کے دوران، یہ بات سامنے آئی کہ ملزم فائدہ اٹھانے والے نے عشم سمبل بانڈی پورہ کے ایک اور فرد کے ساتھ مل کر ایک جعلی PWD سرٹیفکیٹ حاصل کیا۔ مذکورہ جعلی دستاویز کی بنیاد پر، فائدہ اٹھانے والے نے مبینہ طور پر سکمز صورہ سرینگر میں ایم بی بی ایس کورس میں داخلے کے لیے انتخاب حاصل کیا۔

ملزمین کی طرف سے کی گئی کارروائیاں پہلی نظر میں تعزیرات ہند کی دفعہ 420، 468، 471، اور 120-Bکے تحت قابل سزا جرائم کے کمیشن کا انکشاف کرتی ہیں۔ اسی مناسبت سے اس معاملے کا نوٹس لیا گیا ہے اور پولیس اسٹیشن اکنامک آفنسز ونگ، سری نگر (کرائم برانچ) میں باقاعدہ مقدمہ درج کیا گیا ہے۔ بیان میں کہا گیا ہے کہ معاملے کی مزید تفتیش جاری ہے۔