لوک سبھا انتخابات : جموں میں پولیس کی سپیشل آپریشن گروپ کی خواتین اہلکار تعینات

سرینگر /07اپریل

لوک سبھا انتخابات نزدیک آتے ہی جموں میں سیکورٹی کے سخت انتظامات کئے گئے ہیں جس کے چلتے جموں و کشمیر پولیس کی خصوصی طور پر تربیت یافتہ انسداد بغاوت فورس، سپیشل آپریشن گروپ کی خواتین اہلکاروں کی ایک چھوٹی دستہ کو لوک سبھا انتخابات سے قبل جموں میں تعینات کیا گیا ہے۔

خودکار ہتھیاروں اور بلٹ پروف جیکٹوں سے لیس آٹھ رکنی ٹیم کو بکتر بند گاڑی میں گشت کے فرائض انجام دیتے ہوئے اور شہر کے مختلف علاقوں میں تلاشی اور گاڑیوں کی چیکنگ کرتے ہوئے دیکھا جا سکتا ہے۔

اس ضمن میںسپرنٹنڈنٹ آف پولیس (آپریشنز)،کامیشور پوری نے کہا کہ مختلف علاقوں میں تعینات ہونے سے پہلے دستے نے تین ماہ تک سخت تربیت حاصل کی تھی۔ انہیں موٹر گاڑیوں کی معمول کی چیکنگ، علاقے کے تسلط اور ہائی وے پٹرولنگ کا کام سونپا گیا ہے۔ انہوں نے کہا کہ انہیں سینئر افسران کی ہدایت پر تعینات کیا جا رہا ہے اور ٹیم زمین پر ایس او جی کی طاقت میں اضافہ کرے گی۔

انہوں نے کہا ”یہ خواتین کو بااختیار بنانے کی ایک مثال ہے اور ان کی موجودگی ہمیں زمینی چیلنجوں سے بہتر طریقے سے نمٹنے میں مدد کرے گی کیونکہ وہ اپنے مرد ہم منصبوں کے ساتھ کندھے سے کندھا ملا کر کام کرتی ہیں۔ “ دریں اثنا، سدھرا بائی پاس، کنجوانی اور گجر نگر پر خواتین پولیس اہلکاروں کی موجودگی نے اس ترقی کا خیرمقدم کرنے والے مسافروں کی نظروں کو اپنی طرف کھینچ لیا۔