سرینگر17ستمبر
فوج کی پندرہویں کمان کے کمانڈر لیفٹیننٹ جنرل راجیو گھائی نے اتوار کے روز اوڑی میں لائن آف کنٹرول پر اگلی چوکیوں کا دورہ کیا۔اس موقع پر انہیں آپریشنل صلاحیت میں اضافے کے بارے میں آگاہ کیا گیا۔
دفاعی ذرائع نے بتایا کہ کور کمانڈر لیفٹیننٹ جنرل راجیو گھائی نے اتوار کے روز اوڑی میں ایل او سی کا دورہ کیا اور وہاں پر فوج کی تیاریوں کا جائزہ لیا۔دفاعی ذرائع نے مزید بتایا کہ کور کمانڈر نے سیکورٹی صورتحال کا جائزہ لینے کے لئے کشمیر میں ایل او سی پر آگے والے علاقوں کا دورہ کیا۔
انہوں نے کہا کہ اس موقع پر گراونڈ پر تعینات کمانڈروں نے آپریشنل تیاریوں اور تازہ سیکورٹی صورتحال کے متعلق بریف کیا۔ان کا کہنا تھا کہ موصوف آرمی کمانڈر نے لائن آف کنٹرول پر سیکورٹی فورسز کے کنٹرول اور تیاریوں کی سراہنا کی۔سرحد پر تعینات اہلکاروں سے بات چیت کے دوران کور کمانڈرنے کہاکہ سخت ترین موسمی صورتحال اور دیگر چیلنجوں کے باوجود فوجی جوان اپنی خدمات خوش اسلوبی کے ساتھ انجام دے رہے ہیں۔انہوں نے بتایا کہ فوج کی کوششوں کے نتیجے میں ہی لائن آف کنٹرول پر اس وقت امن و امان قائم ہے۔
اس سے قبل کور کمانڈر کو فوج کے سینئر آفیسران نے سرحدوں کی صورتحال کے بارے میں بریفنگ دی۔کور کمانڈر کو مخالفین کے چیلنجز کا مقابلہ کرنے کے لئے کئے جانے والے اقدامات کے بارے میں بھی جانکاری فراہم کی گئی۔ذرائع نے بتایا کہ پندرہویں کور کمانڈر نے فوج کے سینئر آفیسران کے ساتھ میٹنگ کی اور لائن آف کنٹرول پر قائم مستحکم دراندازی مخالف گرڈ کی سراہنا کی۔بتادیں کہ اوڑی میں ہفتے کی صبح سیکورٹی فورسز نے دراندازی کے ذریعے اس طرف آنے والے 3 دہشت گردوں کو تصادم آرائی کے دوران مار گرانے کا دعویٰ کیا۔فوج کا کہنا ہے کہ پاکستانی رینجرس دہشت گردوں کو اس طرف دھکیلنے کی خاطر ان کی بھر پور مدد فراہم کر رہے ہیں۔یو این آئی
Comments are closed.