ریاسی جموں میں مفرور ملی ٹینٹ کو تلاش کرنے کی خاطر نصف درجن علاقوں کا محاصرے

جموں،05ستمبر

ریاسی ضلع کے چسانہ گاوں میں دوسرے روز بھی ملی ٹینٹ مخالف آپریشن جاری رہا۔بتادیں کہ پیر کی سہ پہر سیکورٹی فورسز کے ساتھ تصادم کے دوران ایک عدم شناخت ملی ٹینٹ ماراگیا جبکہ دوسرے نے رہائشی مکان میں پناہ حاصل کی۔

ذرائع نے بتایا کہ مہلوک ملی ٹینٹ کا ساتھی سیکورٹی فورسز کو چکمہ دے کر فرار ہونے میں کامیاب ہوا جس کی بڑے پیمانے پر تلاش شروع کی گئی ہے۔اطلاعات کے مطابق ریاسی ضلع کے چسانہ گاوں میں دوسرے روز بھی سیکورٹی فورسزکا آپریشن جاری رہا۔دفاعی ذرائع نے بتایا کہ پیرکے روز ابتدائی فائرنگ میں ایک عدم شناخت ملی ٹینٹ مارا گیا جبکہ دوسرے نے رہائشی مکان میں پناہ حاصل کی۔انہوں نے بتایا کہ منگل کی صبح جوں ہی سیکورٹی فورسز کے اہلکار رہائشی مکان کے اندر گئے تو وہاں پر مہلوک ملی ٹینٹ کا ساتھی موجود نہیں تھا۔

ان کے مطابق چسانہ کا تولی گاوں پہاڑی علاقہ ہے اور اسی کا فائدہ اٹھا کر ملی ٹینٹ رات کے دوران چکمہ دے کر فرار ہونے میں کامیاب ہوا ہے۔انہوں نے کہاکہ مفرور ملی ٹینٹ کو تلاش کرنے کی خاطر نصف درجن کے قریب گاوں کو محاصرے میں لے کر تلاشی آپریشن کا دائرہ وسیع کیا گیا جبکہ اضافی کمک کو بھی جنگلی علاقے کی اور روانہ کیا گیا ہے۔ان کا مزید کہنا تھا کہ جنگلی علاقے کو سیکورٹی فورسز نے پوری طرح سے سیل کرکے فرار ہونے کے سبھی راستوں پر پہرے بٹھا دئے ہیں۔دفاعی ذرائع نے بتایا کہ پیر کے روز سیکورٹی فورسز کی فائرنگ میں مارے گئے جنگجو کی لاش برآمد کی گئی اور اس کے قبضے سے ایک رائفل ، دو میگزین اور دوسرا قابل اعتراض مواد برآمد کرکے ضبط کیا گیا۔

جموں میں مقیم دفاعی ترجمان لیفٹیننٹ کرنل سنیل برتوال نے منگل کے روزبتایاکہ ریاسی کے چسانہ گاوں میں ایک ہارڈ کور ملی ٹینٹ مارا گیا جس کے قبضے سے بڑی مقدار میں اسلحہ وگولہ بارود اور قابل اعتراض مواد برآمد کیا گیا ہے۔انہوں نے کہاکہ علاقے میں اور ایک ملی ٹینٹ چھپا بیٹھا ہے جس کومار گرانے کی خاطر گاوں میں دوسرے روز بھی تلاشی آپریشن جاری رہا۔ان کا مزید کہنا تھا کہ سیکورٹی فورسز نے ایک وسیع علاقے کو محاصرے میں لے رکھا ہے۔یو این آئی