G20اجلاس کے پیش نظر سری نگر فوجی چھاونی میں تبدیل، جھیل ڈل میں میرین کمانڈوز کی تعیناتی

سرینگر/16مئی

سری نگر میں ہونے والی جی ٹونٹی ممالک کی میٹنگ کو مد نظر رکھتے ہوئے جموں وکشمیر میں بالعموم اور سری نگر میں بالخصوص زبردست حفاظتی انتظامات کئے گئے ہیں۔سری نگر اور اس کے ملحقہ علاقوں میں اضافی دستوں کو تعینات کیا گیا ہے جبکہ شہر بھر میں کرایہ داروں کی بھی تفصیلات حاصل کی جارہی ہیں۔منگل کے روز سری نگر میں میٹل ڈیٹریکٹر اور کھوجی کتوں کی مدد سے تلاشی لی جارہی تھی۔

اطلاعات کے مطابق جی ٹونٹی اجلاس کے پیش نظر شہر بھر میں سیکورٹی کے سخت ترین انتظامات کئے گئے ہیں۔شہر بھر میں ناکو ں کا جال بچھایا گیا ہے جہاں پر ہر آنے جانے والے کی باریک بینی سے تلاشی لی جارہی ہیں۔امن و قانون کو برقرار رکھنے کے لئے اضافی دستوں کو شہر سری نگر اور اس کے گرد نواح کے علاقوں میں تعینات کیا گیا ہے۔ شہرہ آفاق جھیل ڈل کے کنارے ایس کے آئی سی سی میں ہونے والی اس میٹنگ کے پیش نظر ڈل جھیل میں میرین کمانڈوز کو بھی تعینات کیا گیا ہے تاکہ میٹنگ کے شرکا کی حفاظت کو یقینی بنایا جاسکے۔پورے شہر میں حفاظتی دستے لگاتار گشت کر رہے ہیں جبکہ شہر کے داخلی اور خارجی راستوں پر خصوصی چیک پوائنٹس قائم کئے گئے جہاں پر کسی بھی گاڑی کو بغیر تلاشی کے سری نگر کے حدود میں جانے کی اجازت نہیں دی جارہی ہیں۔

امن مخالف قوتوں کی سازشوں کو ناکا م بنانے کے لئے پوری وادی میں سیکورٹی فورسز کو الرٹ پر رکھا گیا ہے اور ہر جگہ حالات پر کڑی نگاہ رکھی جارہی ہیں۔

ذرائع نے بتایا کہ جموں وکشمیر پولیس کی جانب سے شہر کے حدود میں کرایہ داروں کی تفصیلات حاصل کی جارہی ہیں اور لوگوں سے بھی تلقین کی جارہی ہیں کہ وہ بغیر اطلاع کے کسی کو کرایہ پر کمرہ نہ دیں۔

معلوم ہوا ہے کہ شہر میں رات کے دوران بھی گشت تیز کیا گیا ہے جبکہ مشکوک نظر آنے والے افراد پر سی سی ٹی وی کیمروں کے ذریعے نظر گزر رکھی جارہی ہیں۔ ذرائع کے مطابق شہر سری نگر میں سماج دشمن عناصر کے منصوبوں کو ناکام بنانے کی خاطر سیکورٹی کے فقید المثال انتظامات کئے گئے ہیں جبکہ سابق ملی ٹینٹوں اور سنگبازوں کی پولیس تھانوں پر طلبی کا سلسلہ بھی شروع کیا گیا ہے۔واضح رہے کہ اس میٹنگ میں جی ٹونٹی ممالک کے نمائندوں سمیت کئی عالمی اداروں کے دو سو مندوبین شرکت کریں گے۔یو این آئی