شرمال کے بعد حاجی پورہ شوپیان میں فوج و فورسز اور جنگجوئوں کے مابین مسلح تصادم

سرینگر/25جون/سی این آئی// شرمال کے بعد شوپیان کے حاجی پورہ علاقے میں فوج و فورسز اور جنگجوئوں کے مابین جاری تصادم آرائی میں ایک جنگجوجاں بحق ہو گیا ہے جبکہ دوسرے نے خود سپردگی کی ۔ پولیس نے جھڑپ میں جنگجو کی ہلاکت کی تصدیق کرتے ہوئے بتایا کہ دونوں جنگجوئوں کو با ر بار خود سپردگی کی پیشکش کی گئی تاہم ایک مقامی لشکر نے پیشکش قبول کر کے ہتھیار ڈال دئے جبکہ دوسرے نے پیشکش ٹھکرا دی ۔ سی این آئی کے مطابق شوپیان کے حاجی پورہ علاقے میں دو جنگجوئوں کی موجودگی کی اطلاع ملنے کے بعد فوج ، سی آر پی ایف اور جموں کشمیر پولیس نے مشتر کہ طور جمعہ کے دوپہر علاقے کو محاصرے میںلیا ۔ ذرائع سے معلوم ہوا ہے کہ جونہی علاقے میں تلاشی آپریشن شروع کر دیا گیا تو وہاں چھپے بیٹھے جنگجوئوں نے فرار ہونے کی کوشش میں فورسز پر فائرنگ کی جس کے ساتھ ہی علاقے میں دو بددو جھڑپ شروع ہوئی ۔ ذرائع کے مطابق اسی دوران فورسز کی اضافی کمک علاقے کی جانب روانہ کی گئی جنہوں نے پورے علاقے کو سیل کر دیا اور جنگجوئوںکے فرار ہونے کے تمام راستے سیل کر دئے گئے ۔ذرائع کے مطابق ابتدائی جھڑپ کے ساتھ ہی علاقے میں شدید گولیوں کا تبادلہ ہواور علاقے کو مکمل طور پر سیل کیا گیا تاکہ جنگجو ئوں کو فرار ہونے کا موقعہ نہ ملا ۔ ذرائع کے مطابق ابتدائی فائرنگ کے ساتھ ہی علاقے میں گولیوں کا تبادلہ تھم گیا جس کے بعد دوبارہ گولی باری شرو ع ہوئی ۔ذرائع کے مطابق ابتدائی گولی باری کے نتیجے میں ایک جنگجو جاں بحق ہو گیا جبکہ دوسرے نے نزدیکی مکان میں پناہ لی ۔معلوم ہوا ہے کہ سیکورٹی فورسز نے مکان میں محصور جنگجو کو خود سپردگی کرنے کی بار بار پیشکش کر دی جس کے بعد اس نے ہتھیار ڈال دئے اور سیکورٹی فورسز کے سامنے خود سپردگی کر دی ۔ پولیس نے جھڑ پ میں ایک جنگجو کی ہلاکت کی تصدیق کرتے ہوئے بتایا کہ علاقے میں آپریشن جاری ہے ۔ پولیس نے ٹویٹ کرتے ہوئے معرکہ آرائی کے دوران ایک عدم شناخت جنگجو کے جاں بحق ہونے کی اطلاع دی۔ادھر پولیس کے ایک سنیئر آفیسر نے جھڑپ میں ایک جنگجو کی ہلاکت کی تصدیق کرتے ہوئے بتایا کہ دوسرے جنگجو نے خود سپردگی کی ۔ انہوں نے بتایا کہ سرینڈر کرنے والے جنگجو کی شناخت ساحل احمد ساکنہ برمری پورہ شوپیان کے بطور ہوئی ہے جبکہ جاں بحق جنگجو کی شناخت ہونی ابھی باقی ہے ۔ پولیس کے مطابق علاقے میں ابھی آپریشن جاری ہے ۔