دلی میں آکسیجن کی قلت اور بحرانی صورتحال پر کانگریس فکر مند ؛ راہل گاندھی نے کووڈ بیڈ اور آکسیجن بحران لے لئے مودی حکومت کو ذمہ دار قرار دیا

سرینگر: کورونا کے غیر متوقع بحران کے حوالہ سے راہل گاندھی نے مودی حکومت پر حملہ بولتے ہوئے کہا کہ کووڈ کی وجہ سے لوگ پریشان ضرور ہیں لیکن اموات آکسیجن اور آئی سی یو بیڈ کی کمی کے سبب ہو رہی ہیں۔دلی میں آکسیجن کے بحران پر راہل گاندھی نے مرکزی سرکار کو تنقید کا نشانہ بناتے ہوئے کہا کہ بحرانی کیفیت کیلئے مودی سرکار ذمہ دار ہے ۔ا نہوں نے کہا کہ ملک میں کورونا کی دوسری لہر کے تحت کووڈ بیڈ اور میڈیکل آکسیجن کی کمی نے ملک کی طبی خدمات کی قلعی کھول کر رکھ دی ہے۔ کہیں آکسیجن نہیں مل پانے کی وجہ سے مریضوں کی موت واقع ہو رہی ہے، تو کہیں کچھ لوگوں کو اسپتالوں میں بیڈ میسر نہیں ہو پا رہا۔کرنٹ نیوز آف انڈیا کے مطابق کانگریس کے لیڈر راہل گاندھی نے جمعہ کے روز اس غیر متوقع بحران کے حوالہ سے مودی حکومت پر حملہ بولا اور کہا کہ کوووڈ کی وجہ سے لوگوں کو دقتیں پیش آ رہی ہیں لیکن اموات آکسیجن اور آئی سی یو بیڈ کی کمی سے ہو رہی ہیں۔اپنے ٹوئٹ میں راہل گاندھی نے لکھا، ’’کورونا سے مریض کا آکسیجن لیول گر سکتا ہے لیکن یہ آکسیجن اور آئی سی یو بیڈ کی کمی سے بہت سی اموات واقع ہو رہی ہیں۔ حکومت ہند! یہ آپ کی وجہ سے ہو رہا ہے۔‘‘خیال رہے کہ کورونا کی دوسری لہر میں لوگوں کے پھیپھڑوں پر سب سے زیادہ اثر ہو رہا ہے، جس سے مریضوں کا آکسیجن لیول خطرناک طور پر گر رہا ہے، اس لے اس بار میڈیکل آکسیجن دینے کی زیادہ ضرورت پیش آ رہی ہے۔گزشتہ کچھ دنوں سے مہاراشٹر، دہلی سمیت کئی ریاستیوں کے اسپتالوں کے سامنے آکسیجن سپلائی، بیڈ اور ادیات کی کمی کا مسئلہ کھڑا ہوا ہے۔ کئی اسپتال لگاتار آکسیجن کی کمی سے دو چار ہیں۔ جمعہ کی صبح ہی دہلی کے ٹاپ اسپتالوں میں سے ایک سر گنگا رام اسپتال نے بتایا کہ گزشتہ 24 گھنٹوں میں یہاں داخل 25 انتہائی بیمار مریضوں کی موت ہو گئی۔اس کے علاوہ دوسری ریاستوں میں بھی صورت حال نازک بنی ہوئی ہے۔ آکسیجن سپلائی کے حوالہ سے ہائی کورٹ اور سپریم کورٹ میں بھی سماعت کی گئی ہے۔ سپریم کورٹ نے جمعرات کو کہا تھا کہ وہ چاہتا ہے کہ اس سے نمٹنے کے لئے ایک قومی پلان تیار کیا جائے۔ وزیر اعظم نریندر مودی نے آج ایک اعلی سطحی میٹنگ کی جس میں 10 ریاستوں کے وزرائے اعلیٰ شریک ہوئے۔