کھیلو انڈیا کا دوسرا مرحلہ 26فروری سے شروع،تیاریاں مکمل؛ فیسٹیول کیافتاحی تقریب کے موقع پر متعدد شخصیات کی گلمرگ آمد متوقع

سری نگر: مشہور سیاحتی مقام گلمرگ میں 26فروری سے کھیلو انڈیاکا دوسرا مرحلہ شروع ہونے جا رہا ہے اس دوران محکمہ سیاحت کے حکام نے بتایا کہ اس پرگرام کی مدد سے وادی کشمیر میں سیاحت کو فروغ ملے گا۔کشمیر نیوز سروس( کے این ایس) کے مطابق مشہور سیاحتی مقام گلمرگ کی برفیلی چٹانوں پر 26 فروری سے ’کھیلو انڈیا‘ کا دوسرا مرحلہ منعقد کیا جا رہا ہے۔ حکام کا کہنا ہے کہ اس انعقاد سے کشمیر کی سیاحت کو فروغ ملے گا۔کشمیر کے ناظم سیاحت غلام نبی ایتو نے سرینگر میں ایک تقریب کے حاشیہ پر میڈیا کے نمائندوں سے بات کرتے ہوئے ’کھیلو انڈیا‘ کی تیاریوں کے سلسلے میں جانکاری دی۔انکا کہنا تھا کہ کھیلو انڈیا میں قریبا ملک کے ایک ہزار کھلاڑی مختلف کھیلوں میں حصہ لے رہے ہیں جن کے ساتھ دیگر افسران بھی ہوں گے۔انکا کہنا تھا کہ یہ کھلاڑی کشمیر کی سیاحت کے سفیر بنیں گے اور ملک بھر میں سیاحت کو تشہیر دے کر یہاں کی سیاحت کو فروغ دینے میں کافی مدد گار ثابت ہوں گے۔ناظم سیاحت نے مزید کہا کہ کھلاڑیوں اور دیگر افسران کے لئے گلمرگ میں تمام تیاریاں کی جا چکی ہیں اور اب محض 26فروری کا انتظار ہے۔قابل ذکر ہے کہ گزشتہ ہفتے کھیلو انڈیا کے متعلق گلمرگ میں کھلاڑیوں کو ہوٹل دستیاب نہ ہونے پر تنازعہ ہوا تھا جس کو لے کر انتظامیہ کو صفائی دینی پڑی تھی۔اطلاعات کے مطابق ضلع بارہمولہ کی انتظامیہ نے ہوٹل مالکان کو حکمنامہ جاری کیا تھا کہ وہ کھیلو انڈیا کے پیش نظر سیاحوں کی بکنگ منسوخ کریں۔ تاہم تنازعہ ہونے پر انتظامیہ نے یہ احکامات واپس لئے تھے۔ناظم سیاحت غلام نبی ایتو کا کہنا تھا کہ تمام تیاریاں مکمل ہے اور ہوٹلوں میں بھی معقول انتظام کیا گیا ہے۔بتایا جاتا ہے کہ 26فروری کو وزیر اعظم نریندر مودی گلمرگ آئے گے یا اس فیسٹیول کا افتتاح بذریعہ ویڈیو کانفرنس کریں گے۔ ناظم سیاحت نے بتایا کہ وہ اس پر حتمی جانکاری نہیں دے پائے گے تاہم اس فیسٹیول کے موقع پر متعدد شخصیات گلمرگ آئیں گے۔