پیر پنچال کے آر پار شدید برفباری کا سلسلہ تیسرے روز بھی جاری ، ہر طرف سفید ہی سفید

بجلی کا نظام پوری طرح درہم برہم ، سڑکیں بند ،پوری وادی شدید سردی کی لپیٹ میں ، آج سے موسم میں بہتری کا مکان

سرینگر/05جنوری: چلہ کلان کے سخت تیور کے بیچ پیرپنچال کے آر پار تیسرے روز بھی شدید برفباری کے نتیجے میں واد ی کے طول و عرض میںمعمول کی زندگی بری طرح سے متاثر ہوئی۔شہر سرینگر سمیت وادی کے شمال و جنوب میںوقفے وقفے سے برفباری کاتازہ سلسلہ شروع جاری رہا جبکہ جنوبی کشمیر میں ایک مرتبہ پھر رات کے دوران بھاری برفباری ریکارڈ کی گئی تاہم شمالی کشمیر میں اس کے برعکس کم ہی برفباری ہوئی ۔ برفباری کے چلتے سرینگر جموں شاہراہ سمیت درجنوں رابطہ سڑکیں ٹریفک کی آمد رفت کیلئے بند پڑی ہوئی ہے جبکہ کم روشنی کی وجہ سے سرینگر کے بین الاقوامی ہوئی اڈے پر فضائی ٹریفک بھی متاثر رہا ۔ اسی دوران تازہ برفباری کے بعد بجلی کا نظام پوری طرح درہم برہم ہو گیا جبکہ پوری وادی شدید سردی کی لپیٹ میں آگئی ہے جس کے نتیجے میں شہر کے بازاروں میں مجموعی طور پر ویرانی چھائی رہی اور خریداروں کی بہت کم تعداد بازاروں میں نظر آئی۔ ادھر محکمہ موسمیات نے بدھ سے موسمی صورتحال میں بہتری آنے کے امکانات ظاہر کرتے ہوئے مزید برفباری کی پیشگوئی کی ہے ۔سی این آئی کے مطابق محکمہ موسمیات کی پیشگوئی کے عین مطابق وادی کے شمال و جنوب کے بالائی علاقوں کے ساتھ ساتھ میدانی علاقوں میں بھی مسلسل تیسرے رو ز بھی برفباری کا سلسلہ دن بھر جاری رہا ۔شہر سرینگر سمیت وادی کے دوسرے اضلاع میں سوموار کی شام سے ہی تازہ برفباری کا تازہ سلسلہ شروع ہوا جو منگل کی شام تک جاری رہا۔تازہ برفباری نتیجے میں شہر سرینگر میں عام اور کاروباری زندگی پر اثر پڑا اورشہر کی سڑکوں پر پانی جمع ہونے سے عام لوگوں کو عبور و مرور کے حوالے سے سخت مشکلات کا سامنا کرنا پڑا۔وادی کے شمال و جنوب میں واقع دیگر اضلاع میں بھی تازہ برفباری ہوئی ہے ۔میدانی علاقوں کے برعکس بعض بالائی علاقوں میں بھاری برفباری ہوئی ہے۔کپوارہ،بارہمولہ ،بڈگام ،گاندربل ،پلوامہ ،اننت ناگ ،شوپیان اور کولگام سے موصولہ اطلاعات کے مطابق ان تمام اضلاع کے میدانی علاقوں میںہلکی سے درمیانی درجہ تک کی برفباری ریکارڈ کی گئی ، ۔اس دوران سونہ مرگ،لداخ کے بیشتر علاقوں ، پہلگام ، مڑھل ، ٹیٹوال ، گریز ،زوجیلااور اوڑی کے بالائی علاقوں میں بھی تازہ برفباری کی اطلاعات ملی ہیں۔ پہلگام ،آڑو، چندن واڑی ،سونہ مرگ ،زوجیلا ، گگن گیر ،گنڈ ،یوسمرگ ،افروٹ ،سادھنا ٹاپ ،فرکیاں گلی ،میلیال ،مڑھل اور اس کے مضافاتی علاقوں میں اوسطاً ایک سے تین فٹ برفباری ریکارڈ کی گئی۔گلمرگ سے نمائندے نے اطلاع دی ہے کہ گلمرگ کی اونچی پہاڑیوں اور میدانوں میں تازہ برفباری سے سیاحوں میں مسرت کی لہر دوڑ گئی۔محکمہ موسمیات کے مطابق گلمرگ میں گزشتہ شب کے دوران قریب تین فٹ تازہ برف ریکارڈ کی گئی ہے جبکہ آس پاس کے اونچائی والے علاقوں میں اس سے بھی زیادہ برفباری ہوئی ہے۔ادھرسرحدی قصبہ اوڑی کے چھو لاں ،زمبور پٹن ،کلسا،نامبلہ ،گھر کوٹ ،چوٹالی ،ددرن ،میدانن ،لچھی پورہ ،مائین ،براری پورہ ،ترکانجن اور ملحقہ علاقوں میں تازہ برفباری ہوئی۔شوپیان سے نمائندے نے اطلاع دی ہے کہ ضلع کے بالائی علاقوں میں جم کر برفباری ہوئی۔اہر بل ،سیدھو ، ہیر پورہ اور پیر کی گلی میںبھاری برفباری کی اطلاع ہے۔سرحدی علاقوں میں تازہ برفباری سے متعدد سڑکیں گاڑیوں کی آمدورفت کیلئے بند کردی گئی ہیں۔بانڈی پورہ سے موصولہ اطلاعات میں کہا گیا ہے کہ گریزسیکٹر میں بھی بھاری برفباری ہوئی جبکہ شمالی کشمیر میں واقع لائن آف کنٹرول کے بیشتر سیکٹروں میں بھی جم کر برفباری ہوئی ہے۔ اْدھر جواہر ٹنل کے اْس پار پیر پنچال پہاڑی سلسلے کے ساتھ ساتھ بدھل راجوری ، گلبرگ، مہور، بھدرواہ،ڈوڈہ، کشتواڑ، چھاترو، مڑوا، دچھن اور بنی کے علاوہ ویشنو دیوی مندر کی مضافاتی پہاڑیوں پر تازہ برفباری کی اطلاعات موصول ہوئی ہیں۔نمائندے کے مطابق سرینگر جموں شاہراہ کے مختلف مقامات پر بھی تازہ برفباری کے بعد جموں سرینگر شاہراہ کو ٹریفک سمیت دیگر کئی درجنوں رابطہ سڑکیں ٹریفک کیلئے بند پڑی ہوئی ہے ۔ادھر سرینگر سے نمائندے نے اطلاع دی ہے کہ تازہ برفباری کے نتیجے میں کم روشنی کی وجہ سے سرینگر کے بین الاقوامی ہوائی اڈے پر منگل کو تمام پروازیں منسوخ کر دی گئی ۔برفباری کے تازہ سلسلے کے بیچ جہاں ایک طرف معمول کی زندگی بری طرح سے متاثر ہوئی، وہیں دوسری جانب رات کے کم سے کم درجہ حرارت میں بھاری اضافہ دیکھنے کو ملا۔ دریں اثناء محکمہ موسمیات نے بتایا کہ وادی میںاگلے 24گھنٹوں تک مطلع ابر آلود رہنے کا امکان ہے اور اس دوران بارشیں اور برفباری بھی ہوسکتی ہے۔( سی این آئی)