وادی اور لداخ میں چلہ کلان کے تیور انتہائی سخت ، شدید ٹھنڈ نے لوگوں کا باہر نکلنا محال کر دیا

05جنوری سے پیر پنچال کے آر پار درمیانی درجے کی برفباری اور بارشوں کا امکان / محکمہ موسمیات کی پیشگوئی

سرینگر/02جنوری: بادشاہ چلہ کلان کے سخت تیور کے بیچ سردی کی لہر نے وادی کو اپنی لپیٹ میں لے لیا جبکہ سرینگر میں مسلسل درجہ حرارت نقطہ انجماد سے نیچے گر کر منفی میں ریکارڈ کیا گیا۔ اس دوران وادی میں ایک مرتبہ پھر سرد ترین رات ریکار ڈ کی گئی اور شبانہ درجہ حرارت منفی 5.9ڈگری ریکارڈ کیا گیا۔ اس دوران سرینگر میںاعلیٰ صبح شدید دھند چھائی رہی جس کے نتیجے میں معمول کی زندگی کئی گھنٹوں تک متاثر رہی۔جبکہ جموں میں بھی شدید سردی کی لہر جاری ہے ۔ادھر محکمہ موسمیات نے 5جنوری سے درمیانی درجے کی برفباری اور بارشوں کی پیشگوئی کی ہے ۔ سی این آئی کے مطابق شدید سردی کی لہر نے وادی کو اپنی لپیٹ میں لے لیا ہے اور اس دوران صبح و شام یخ بستہ ہواؤں کی وجہ سے عام زندگی معطل ہو کر رہ گئی ہے۔اگرچہ رات بھر آسمان کھلا رہتا ہے تاہم اس دوران کھلے آسمان کی وجہ سے سردی میں بے پناہ اضافہ ہو رہا ہے جبکہ رات کے وقت ہڑیوں کو گلا دینے والی اس سردی کی وجہ سے بیشتر لوگ گھروں سے باہر نہیں آتے۔دن بھر اگر چہ کبھی کبھی فضاء میں سورج بھی جلوا ہ افروز ہوتا تاہم اس دوران بھی سرد ہواؤں کی لہر سورج کی تمازت کو کھا جاتی ہے۔شہر سرینگر سمیت وادی کے جنوب و شمال میں سردیو ں کی وجہ سے صبح دیر سے دن شروع ہوتا ہے اور شام کو جلد ہی رات ہونے کی وجہ سے اوقات کار میں بھی کمی آئی ہے۔ موسم سرماکی آمد کے ساتھ ہی وادی میں عام زندگی اگر چہ متاثر ہوتی ہے تاہم سخت ترین سردیوں اور یخ بستہ ہواؤں کی وجہ سے اس میں اضافہ ہوتا ہے۔ دریں اثناء سرینگر سمیت وادی کے بیشتر علاقوں میں درجہ حرارت بھی نقطہ انجماد سے مسلسل نیچے گر گیا اور جمعہ اور سنیچروار کی شب سرد ترین رات کے طور پر ریکارڈ کی گئی۔ سرینگر میں بھی درجہ حرارت کے گرنے کی وجہ سے موسم کی انتہائی سرد رات کو ریکارڈ کیا گیا جبکہ مجموعی طور پر منفی 5 اعشاریہ 9ڈگری کادرجہ حرارت ریکارڈ کیا گیا۔ ادھر معلوم ہوا ہے کہ وادی کے دیگر علاقوں میں بھی سرد لہر جاری ہے۔خطہ لداخ کا لیہہ بدستور سرد ترین جگہ بنی ہوئی ہے، جہاں کم سے کم درجہ حرارت منفی 15اعشاریہ ایک ڈگری ریکارڈ کیا گیا۔ سنیچروار کی صبح پینے کے پانی کے نل منجمند پائے گئے۔ کچھ ایک آبی ذخائر کو بھی جزوی طور پر منجمند پایا گیا۔ تاہم سری نگر سمیت وادی کے تمام علاقوں میں دوپہر ایک بجے سے اچھی خاصی دھوپ کھلی رہی۔ اس دوران سری نگر میں صبح شدید دھند چھائی رہی جس کے نتیجے میں معمول کی زندگی کئی گھنٹوں تک متاثر رہی۔ شدید دھند کی وجہ سے گاڑیوں کی آمدورفت کئی گھنٹوں تک متاثر رہی ۔ ادھر جموں میں بھی شدید سردی کی لہر جاری ہے جس کے نتیجے میں لوگوں کو شدید مشکلات کا سامنا ہے ۔ اسی دوران محکمہ موسمیات کے ایک ترجمان نے بتایا کہ جموں کشمیر میں اگلے چوبیس گھنٹوں کے دوران موسم مجموعی طور پر خشک رہے گا، جس کے نتیجے میں کم سے کم درجہ حرارت میں مزید گراؤٹ درج کی جاسکتی ہے۔ محکمہ موسمیات کے مطابق پانچ جنوری سے پیر پنچال کے آر ہار درمیانی درجے کی بارشیں اور برفباری ہونے کا امکان ہے ۔