گاندربل چوک میں سی آر پی ایف بینکر پر گرینیڈ حملہ؛ تین اہلکار زخمی ، علاج و معالجہ کیلئے اسپتال منتقل ، کئی گاڑیوں کو نقصان

سرینگر/23دسمبر/ سی این آئی// وسطی ضلع گاندربل کے توحید چوک دودرہامہ علاقے میں بدھ کے بعد دوپہر اس وقت سنسنی کا ماحول پھیل گیا جب نا معلوم مسلح افراد نے سی آر پی ایف بینکر کو نشانہ بنانے کے غرض سے ہتھ گولہ داغا جو نشانہ چونک کر سڑک پر زور دار دھماکے کے ساتھ پھٹ گیا ۔جس کے نتیجے میں تین سی آر پی ایف اہلکار زخمی ہو گئے ۔ حملے کے فورا بعد سیکورٹی فورسز نے پورے علاقے میں تلاشی کارورائی عمل میںلائی تاہم کسی کی گرفتاری کی کوئی اطلاع موصول نہیںہوئی ۔ سی این آئی کے مطابق نا معلوم افراد نے توحید چوک دودرہامہ گاندربل میں قائم سی آر پی ایف بینکر کو نشانہ بنانے کے غرض سے گرینیڈ پھینکا تاہم وہ نشانہ چونک کر سڑک پر پھٹ گیا ۔ پولیس کے ایک سنیئر آفیسر نے اس کی تصدیق کرتے ہوئے بتایا کہ بدھ کے بعد دوپہر عسکریت پسندوں نے سی آر پی ایف کے 118 بٹالین کے بینکر پر دستی بم سے حملہ کیا۔جو نشانہ چوک کر سڑک پر زور دار دھماکے کے ساتھ پھٹ گیا ۔ پولیس کے مطابق جنگجوئوں نے سی آر پی ایف کو نشانہ بنانے کی کوشش کی تاہم وہ کامیاب نہیں ہو سکے ۔انہوں نے بتایا کہ حملے میںگرینیڈ کی آہنی ریزوں کے نتیجے میںتین سی آر پی ایف اہلکار زخمی ہو گئے ۔ جن کو علاج و معالجہ کیلئے نزدیکی اسپتال منتقل کر دیا گیا ۔ انہوں نے بتایا کہ پولیس نے معاملے کی نسبت کیس درج کرکے حملہ آوروں کی تلاش شروع کر دی ہے ۔ حملے کے ساتھ ہی سیکورٹی فورسز کی اضافی نفری علاقے میں پہنچ گئی جنہوں نے وہاں تلاشی آپریشن عمل میں لایا تاہم کسی کی گرفتاری کی کوئی اطلاع موصول نہیںہوئی ہے ۔