کشمیر شاہراہ اشیائے ضروریہ سے لدی گاڑیوں کی نقل وحمل کے لئے کھلی

سری نگر، 27 اپریل (یو این آئی) وادی کشمیر کو ملک کے دوسرے حصوں کے ساتھ جوڑ نے والی سری نگر – جموں قومی شاہراہ پیر کو ایک دن کے بعد اشیائے ضروریہ سے لدی گاڑیوں کی نقل وحمل کے لئے کھلی۔
بتادیں کہ اتوار کے روز شاہراہ پر صرف سٹیٹ روڈ ٹرانسپورٹ کارپوریشن کی گاڑیوں، جن میں دربارمو ملازمین سوار تھے، کو ہی چلنے کی اجازت تھی۔
دریں اثنا قریب ساڑھے چار سو کلومیٹر طویل سری نگر – لیہہ شاہراہ پر اشیائے ضروریہ سے لدی گاڑیوں کی آمد ورفت حسب معمول جاری ہے۔
ایک ٹریفک عہدیدار نے کہا کہ قومی شاہراہ پر پیر کے روز اشیائے ضروریہ سے لدی گاڑیوں کو سری نگر سے جموں جانے کی اجازت دی گئی۔
انہوں نے کہا کہ اتوار کے روز شاہراہ پر صرف سٹیٹ روڈ ٹرانسپورٹ کارپوریشن کی گاڑیوں جن میں دربار مو کے ملازمین سوار تھے، کو چلنے کی اجازت تھی۔
موصوف عہدیدار نے بتایا کہ پیر کے روز اشیائے ضروریہ سے لدی گاڑیوں، جن میں سبزیاں، پھل اور دیگر ضروری چیزیں تھیں، کے علاوہ تیل کے ٹینکروں کو سری نگر سے لداخ روانہ ہونے کی اجازت دی گئی۔
انہوں نے بتایا کہ قومی شاہراہ پر کسی بھی مسافر بردار گاڑی کو چلنے کی اجازت نہیں ہوگی اور شاہراہ پر ٹرک ڈرائیوروں اور ان کے کلینروں کے لئے میڈیکل سینٹر قائم کئے گئے ہیں جہاں ان کا چک اپ کرنا ضروری ہے۔ انہوں نے کہا کہ ٹرک ڈرائیور اور اس کے ہلپر کے علاوہ کسی بھی شخص کو ٹرک میں سفر کرنے کی جازت نہیں ہے۔
قابل ذکر ہے کہ کورونا وائرس کے پیش نظر سری نگر – جموں قومی شاہراہ اور سری نگر – لیہہ شاہراہ پر گذشتہ ایک ماہ سے صرف اشیائے ضروریہ سے لدی گاڑیوں کو ہی چلنے کی اجازت ہے۔