سری نگر، 26 اپریل : کورونا وائرس کو پھیلنے سے روکنے کے لئے نافذ لاک ڈاؤن کی وجہ سے ملک وبیرون ملک پھنسے جموں وکشمیر کے طلبا کی حالت زار پر فکر مندی ظاہر کرتے ہوئے سی پی آئی (ایم) کے سینئر لیڈر محمد یوسف تریگامی نے یونین ٹریٹری انتظامیہ سے اپیل کی ہے کہ وہ ملک کی دوسری ریاستوں کی طرح ان طلبا کی گھر واپسی کے لئے خصوصی انتظامات کرے۔
موصوف لیڈر نے اپنے ایک بیان میں کہا کہ جموں وکشمیر کے ہزاروں طلبا ملک و بیرون ملک درماندہ ہوئے ہیں جو وہاں خوف و مایوسی میں مبتلا ہیں اور یہاں ان کے والدین اپنے بچوں کے تحفظ کے لئے کافی فکر مند ہیں۔
انہوں نے کہا کہ یہ طلبا گھر واپس لوٹنا چاہتے ہیں اور اس سلسلے میں حکومت سے لگاتار اپیلیں کررہے ہیں کیونکہ تعلیمی ادارے بند ہونے سے ان طلبا کو مالی مشکلات کا بھی سامنا ہے۔
مسٹر تاریگامی نے کہا کہ کئی ریاستوں نے اپنے طلبا کو واپس لایا یا واپس لانے پر غور کررہے ہیں۔ حکومت جموں و کشمیر کو بھی ملک و بیرون ملک پھنسے اپنے طلبا کو گھر واپس لانے کے لئے خصوصی انتظامات کرنے چاہئے۔
انہوں نے کہا کہ بنگلہ دیش، یوکرین وغیرہ ممالک میں پھنسے جموں وکشمیر کے طلبا کے پاس پیسے نہیں ہیں جس سے ان کو گونا گوں مشکلات کا سامنا ہے۔
موصوف لیڈر نے کہا کہ حکومت ہند کو ان ممالک کے ساتھ یہ معاملہ اٹھانا چاہئے اور ان طلبا کو گھر واپس لانے کے لئے خصوصی پروازوں کا انتظام کرنا چاہئے۔
Comments are closed.