کورنا وائرس کے خطرات :جموں کشمیر انتظامیہ متحرک، کشمیر پریس کلب بند

مذہبی و سماجی اجتماعات کو منسوخ کرنے کا حکم، کرگل اور لداخ میں دفعہ 144نافذ

سرینگر/17مارچ : 25سالہ نوجوان سمیت مزید تین افراد کے کورنا وائرس ٹیسٹ مثبت آنے کے ساتھ ہی لداخ میں مہلک وائرس میں مبتلا افراد کی تعداد 7تک پہنچ گئی ہے ۔ اسی دوران کورونا وائرس کے پیش نظر ضلع مجسٹریٹ کرگل نے آج جاری کردہ ایک حکمنامہ کے ذریعے سب ڈویژنل مجسٹریٹس (ایس ڈی ایم )کو ہدایت دی ہے کہ وہ اپنے متعلقہ سب ڈویژنز میں مذہبی و سماجی اجتماعات کو محدود اور منسوخ کریں۔جبکہ لداخ میں 144ا نفاذ عمل میں لایا گیا ہے ۔ اسی دوران جموں کشمیر میں بھی انتظامیہ متحرک ہے جبکہ کشمیر پریس کلب کو 31مارچ تک بند کیا گیا ۔سی این آئی کے مطابق جموں کشمیر میں کورنا وائرس کے پھیلنے کے امکانات کے خدشات کے بیچ صوبہ لداخ میں مزید تین شہری کے ٹیسٹ مثبت آنے کے ساتھ ہی مریضوں کی تعداد 7تک پہنچ گئی ہے ۔ لداخ یونین ٹریٹری کے کمشنر سکریٹری رگزن سیمفل نے بتایا کہ مزید تین مریضوں کے ٹسٹ مثبت آئے ہیں اور ان مریضوں کی کل تعداد 7ہو گئی ہے۔لداخ میں پہلے ہی تین مریضوں کے کورونا وائرس ٹیسٹ مثبت آئے ہیں تاہم حکام کے مطابق یہ دونوں مریض روبہ صحت ہو رہے ہیں۔یہ تینوں مریض چھو چھٹ گونمہ علاقے سے تعلق رکھتے ہیں جو ماہ گزشتہ ایران سے لوٹے ہیں۔ حکام نے اس گاوں کو سیل کر دیا ہے اور لوگوں کو تمام تر ضروری اسباب مہیا کیے جارے ہیں۔یونین ٹریٹری انتظامیہ نے دو نوں اضلاع میں تا حکم ثانی تمام تعلیمی اداروں کو بند کیا ہے۔جموں و کشمیر حکومت نے کورونا وائرس کے پھیلا کو روکنے کے پیش نظر تمام سرکاری و نجی تعلیمی اداروں بشمول اسکولوں، کالجوں اور یونیورسٹیوں میں درس وتدریس کا عمل 31 مارچ تک معطل رکھنے کا اعلان کردیا ہے۔ تاہم بورڈ اور دیگر مسابقتی امتحانات شیڈول کے مطابق لئے جائیں گے۔ حکومت نے لوگوں پر زور دیا ہے کہ وہ غیر ضروری سفر اور پبلک ٹرانسپورٹ کا استعمال کرنے سے گریز کریں۔جموں میں تمام سینما گھروں کو بند اور جموں اور وادی میں تمام آنگن واڑی سینٹروں کو بھی ماہ رواں کی 31 تاریخ تک بند کیا گیا ہے۔ انتظامیہ نے لوگوں سے اپیل کی ہے کہ وہ کورونا وائرس سے گھبرانے کے بجائے احتیاط کریں اور انتظامیہ کے ساتھ وقت ضرورت تعاون کریں۔