موسمی پیشگوئی: اسکولوں میں گرمائی تعطیلات میں26جولائی تک توسیع / سکینہ ایتو

حکومت جموں و کشمیر نے خراب موسمی صورتحال اور طلبہ و اساتذہ کی حفاظت کو مدنظر رکھتے ہوئے کشمیر اور جموں کے سرمائی زون کے تمام سرکاری اور تسلیم شدہ نجی اسکولوں کی گرمیوں کی تعطیلات میں 26 جولائی 2026 تک توسیع کر دی ہے۔

وزیر تعلیم سکینہ ایتو نے سماجی رابطے کے پلیٹ فارم ایکس پر اس فیصلے کا اعلان کرتے ہوئے کہا کہ طلبہ، اساتذہ اور ان کے اہل خانہ کی سلامتی حکومت کی اولین ترجیح ہے، اسی لیے تعطیلات میں توسیع کا فیصلہ کیا گیا ہے۔

انہوں نے بتایا کہ کشمیر اور جموں کے سرمائی زون کے تمام سرکاری و نجی تسلیم شدہ اسکول اب پیر، 27 جولائی 2026 سے دوبارہ کھلیں گے۔

وزیرِ تعلیم نے عوام سے اپیل کی کہ وہ خراب موسم کے پیش نظر احتیاطی تدابیر اختیار کریں، محفوظ رہیں اور متعلقہ حکام کی جانب سے جاری کردہ ہدایات اور موسمی مشوروں پر عمل کریں۔