اننت ناگ میں سونے کے سکوں کے فراڈ کا مرکزی ملزم گرفتار/ پولیس

اننت ناگ پولیس نے سونے کے سکوں کی خرید و فروخت کے نام پر مبینہ طور پر لاکھوں روپے کی دھوکہ دہی کے ایک مقدمے میں مطلوب بدنام زمانہ ملزم سجاد احمد بیگ ولد لسا بیگ ساکنہ ڈراوے، لرنو کو گرفتار کر لیا ہے۔

پولیس کے مطابق ملزم کے خلاف پولیس اسٹیشن لرنو میں ایف آئی آر نمبر 27/2026درج ہے، جو بھارتیہ نیائے سنہتا کی دفعات 318(4)، 351(2) اور 61(2) کے تحت قائم کی گئی ہے۔

پولیس نے بتایا کہ یہ مقدمہ سرینگر کے ایک شہری کی شکایت پر درج کیا گیا، جس میں الزام لگایا گیا کہ ملزم اور اس کے ساتھیوں نے رعایتی نرخوں پر سونے کے سکے فراہم کرنے کا جھانسہ دے کر شکایت کنندہ سے 12 لاکھ روپے وصول کیے۔ منصوبہ بند سازش کے تحت لین دین کے دوران شکایت کنندہ کو ایک ناکے پر روک لیا گیا، جہاں مبینہ طور پر سونے کے سکے قبضے میں لے لیے گئے، جس کے نتیجے میں وہ دھوکہ دہی کا شکار ہو گیا۔

تحقیقات کے دوران پولیس نے زبانی بیانات اور تکنیکی شواہد جمع کیے، جن سے ملزم اور اس کے ساتھیوں کے جرم میں ملوث ہونے کے ثبوت سامنے آئے۔ پولیس نے عدالت میں ملزم کی قبل از گرفتاری ضمانت کو چیلنج کیا، جسے معزز عدالت نے منسوخ کر دیا، جس کے بعد ملزم کو گرفتار کر لیا گیا۔

پولیس نے کہا کہ مقدمے کی مزید تحقیقات جاری ہیں اور مفرور ملزمان کی گرفتاری کے ساتھ ساتھ پوری مجرمانہ سازش کا پردہ فاش کرنے کی کوششیں کی جا رہی ہیں۔