لوگ غلط معلومات پھیلانے والے مخصوص مفادات کا شکار نہ ہوں:لیفٹنٹ گورنر

جمو: یکم مارچ
جموں و کشمیر کے لیفٹیننٹ گورنر منوج سنہا نے بدھ کے روز لوگوں پر زور دیا کہ وہ غلط معلومات پھیلانے والے مخصوص مفادات کا شکار نہ ہوں اور انسداد تجاوزات مہم، بجلی کی پیداوار اور پراپرٹی ٹیکس کے بارے میں غلط فہمیاں پیدا کرنے والوں کے جھانسے میں نہ آئیں۔
انہوں نے کہاکہ انسداد تجاوزات مہم کے دوران کسی غریب کو ہاتھ نہیں لگایا جائے گا لیکن کسی بااثر تجاوزات کو بخشا نہیں جائے گا۔ لیفٹیننٹ گورنر نے کہا کہ حکومت کی طرف سے قبضہ شدہ اراضی کو عام آدمی کی فلاح و بہبود کے لیے استعمال کیا جائے گا اور حاصل کی گئی زمین پر اسکول، کالج، اسپتال، کھیلوں کی سہولیات تیار کی جائیں گی۔
لیفٹیننٹ گورنر نے یو ٹی میں پراپرٹی ٹیکس کے نفاذ سے متعلق حقائق کو بھی تفصیل سے بتایا۔ انہوں نے بتایا کہ جموں و کشمیر میں پراپرٹی ٹیکس دیگر ریاستوں کے مقابلے میں سب سے کم ہے۔ جموں و کشمیر کے شہروں میں لگ بھگ 5,20,000 مکانات ہیں۔ ان میں سے 2,06,000 مکانات 1000 مربع فٹ سے کم ہیں اور ان پر کوئی ٹیکس نہیں لگایا جا رہا ہے۔ انہوں نے کہا کہ شہروں، دیہی اور مذہبی مقامات پر رہنے والے 40 فیصد لوگوں پر کوئی ٹیکس نہیں۔ 2,03,600 مکانات 1500 مربع فٹ سے کم ہیں اور ان میں سے 80% گھرانوں کو سالانہ 600 روپے سے کم ادائیگی کرنی ہوگی۔