وادی میں پیٹرول فی لیٹر 98روپے کے پار ؛ پیٹرولیم مصنوعات کی قیمتوں میں گزشتہ تین دہائیوں سے سب سے زیادہ اُچھال

سرینگر/09جون: پیٹرول مصنوعات میں مسلسل اضافہ ہوتا جارہا ہے وادی کشمیر میں پیٹرول فی لیٹر 98روپے کے پار ہوچکا ہے جبکہ دہلی میں پٹرول اور ڈیزل کی قیمتیں بالترتیب 25۔25 پیسے اضافے کے ساتھ بالترتیب 95.56 روپے اور 86.47 روپے فی لیٹر ہوگئیں۔کرنٹ نیوز آف انڈیا کے مطابق پیٹرولیم مصنوعات کی قیمتوں میں گزشتہ برس سے مسلسل اضافہ ہوتا جارہا ہے ۔ گزشتہ برس ماہ جون میں پیٹرول فی لیٹر 82.5روپے تھی جس میں ایک سال میں قریب 14روپے کا اضافہ ہوا ہے جو گزشتہ تین دہائیوں میں سب سے زیادہ اُچھال دیکھنے کو ملا ہے ۔ ادھر ملک کے چار میٹرو شہروں میں پٹرول 25 پیسے اور ڈیزل 27 پیسے مہنگا ہوگیا۔ معروف آئل مارکیٹنگ کمپنی انڈین آئل کارپوریشن کے مطابق بدھ کے روز قومی دارالحکومت دہلی میں پٹرول اور ڈیزل کی قیمتیں بالترتیب 25۔25 پیسے اضافے کے ساتھ بالترتیب 95.56 روپے اور 86.47 روپے فی لیٹر ہوگئیں۔گزشتہ 4 مئی سے اب تک 21 دن پٹرول اور ڈیزل کی قیمتوں میں اضافہ کیا گیا ہے،جب کہ باقی 16 دن قیمتوں میں کوئی تبدیلی نہیں کی گئی ہے۔ اس دوران دہلی میں پٹرول 5.16 روپے اور ڈیزل 5.74 روپے مہنگا ہوچکا ہے۔ممبئی میں پٹرول 24 پیسے مہنگا ہوکر 101.76 روپے ، چنئی میں 23 پیسے اضافے کے ساتھ 96.94 روپے اور کولکاتہ میں 24 پیسے بڑھ کر 95.52 روپے فی لیٹر ہوگیا۔ممبئی میں ڈیزل 27 پیسے ، چنئی میں 23 پیسے اور کولکتہ میں 25 پیسے مہنگا ہوا۔ ممبئی میں ایک لیٹر ڈیزل کی قیمت 93.85 روپے، کولکاتہ میں 89.32 روپے اور چنئی میں 91.15 روپے ہوگئی ہے۔پٹرول اور ڈیزل کی قیمتوں کا روزانہ جائزہ لیا جاتا ہے اور اسی بنا پر روزانہ صبح 6 بجے سے نئی قیمتوں پر عمل درآمد ہوتا ہے۔