کشمیر مسئلہ کا اقوام متحدہ کی قرار دادوں اورکشمیری عوام کی امنگوں کے مطابق حل چاہتے ہیں / / عمران خان

سرینگر/23مارچ /سی این آئی// کشمیری عوام کے حق خودارادیت کی منصفانہ جدوجہد کی حمایت جاری رکھنے کا عہد کرتے ہوئے وزیر اعظم پاکستان وزیراعظم عمران خان اور صدر ڈاکٹر عارف علوی نے کہا ہے کہ ہمارا وڑن پاکستان کو ریاست مدینہ کی طرز پر ایک حقیقی جمہوری فلاحی ریاست میں تبدیل کرنا ہے ۔ سی این آئی مانیٹرنگ کے مطابق پاکستان کے وزیراعظم عمران خان نے یوم پاکستان کے موقع پر پیغام میں کہا کہ 23 مارچ 1940 ایک تاریخی موقع تھا جب برصغیر کے مسلمانوں نے اپنے آپ کو ہندوتوا ذہنیت کے جبر اور غلامی کے شکنجوں سے آزاد کرنے کے لئے ایک علیحدہ وطن کے قیام کا فیصلہ کیا، اس دن کو مناتے ہوئے ہمیں قائداعظم محمد علی جناح کی جانب سے وضع کیے گئے ’’اتحاد، ایمان اور تنظیم’’ کے اصولوں پر عمل پیرا ہونے کی ضرورت ہے۔ ہمارا وڑن پاکستان کو ریاست مدینہ کی طرز پر ایک حقیقی جمہوری فلاحی ریاست میں تبدیل کرنا ہے۔عمران خان نے کہا کہ آج ہمیں کورونا وباء کا سامنا کرنے کے لئے مضبوط رہنے کی ضرورت ہے جس نے پوری دنیا کو اپنی لپیٹ میں لے رکھا ہے، ہم آزمائش کی اس گھڑی میں بھی سرخرو ہوں گے۔پاکستان کے وزیراعظم کا کہنا تھا کہ اس دن ہم جموں و کشمیر کے معصوم لوگوں سے بھی اظہار یکجہتی کرتے ہیں جنہیں بھارتی سیکورٹی فورسز کی جانب سے جبر کا سامنا ہے، ہم ان کی جرات و ہمت کو سلام پیش کرتے ہیں۔انہوںنے کہا کہ ہم اقوام متحدہ کی سلامتی کونسل کی متعلقہ قراردادوں کے مطابق حق خودارادیت کے حصول کے لئے کشمیری عوام کی اخلاقی، سیاسی اور سفارتی حمایت جاری رکھیں گے۔ادھر پاکستان کے صدر ڈاکٹر عارف علوی نے قوم کے نام پیغام میں کہا کہ پاکستان کو معاشی طور پر مضبوط اور خوشحال بنانے کے عزم کا اعادہ کرتے ہیں ، ہم اپنے ملک میں جمہوری اقدار ، قانون کی حکمرانی اور اسلامی طرز ِزندگی کو برقرار رکھنے کا بھی عہد کرتے ہیں۔ڈاکٹر عارف علوی نے مزید کہا کہ آج کے دن ہمیں اپنے کشمیری بھائیوں کو بھی یاد رکھنا چاہیے، مظلوم کشمیریوں کو بھارتی فورسز نے دہائیوں سے محکوم بنا رکھا ہے، کشمیریوں کوظلم کا نشانہ بنایا گیا ہے ، اپنے کشمیری بھائیوں کے حق خودارادیت کی منصفانہ جدوجہد کی حمایت جاری رکھنے کا عہد کرتے ہیں۔