ماحول کو آلودگی سے بچانے اور گلوبل وارمنگ کی زد سے محفوظ رکھنے کیلئے

سرینگر/06مارچ: وادی گلپوش میں آجکل شجر کاری مہم اپنے عروج پر ہے سرکاری و غیر سرکاری اور رضاکار تنظیموں کی جانب سے بڑی تعداد میں پیڑ پودے لگائے جا رہے ہیں تاکہ جنت نما کشمیر کو گلوبل وارمنگ اور زھر آلودہ گیسوں کے اخراج سے محفوظ رکھا جا سکے ۔سی این آئی نمائندے کے مطابق کشمیر وادی میں ماحول کو آلودگی سے بچانے اور گلوبل وارمنگ کی زد سے محفوظ رکھنے کے ضمن میں حکومت کی جانب سے بڑے پیمانے پر شجر کاری کی جا رہی ہے جس کے تحت پوری وادی میں خصوصاً جنوبی کشمیر کے مختلف علاقوں میں خالی پڑی بنجر اراضی کو پھر سے آباد کرنے کے لئے کاروائیاں شروع کی گئی ہیں سرکار جہاں شجر کاری کے حوالے سے نہایت ہی سنجیدہ نظر آرہی ہے تو وہی غیر سرکاری اور رضاکار تنظیمیں بھی اپنا اہم کردار ادا کر رہی ہے علاوہ ازیں وادی کو گلوبل وارمنگ اور ماحولیاتی آلودگی سے محفوظ رکھنے کے لئے عام لوگ بھی پیڑ پودے لگا کر اپنی ماحول دوستی کا ثبوت پیش کر رہے ہیں ۔عوامی حلقوں کا کہنا ہے کہ متعلقہ محکموں کوچاہئے کہ وہ ان لوگوں کی آگاہی کے لئے تقریبات کا اہتمام کریں جو جو شجر کاری کی افادیت سے ابھی تک نا واقف ہے اور ساتھ ہی سکولوں اور کالجوں میں بھی اس حوالے سے جانکاری کیمپ منعقد کرنے کاسلسلہ دراز کریں تاکہ نوجوان نسل کو پوری طرح سے پیڑ پودے لگانے کی زور وشور سے جاری اس مہم کے ساتھ جوڑا جا سکے ۔ادھر نمائندے کے مطابق وادی میں گزشتہ 30سال سے نا مساعد حالات کی آڑ میں سر سبزو شاداب جنگلوں کو جس بے دردی کے ساتھ لوٹا گیا اسکی نظیر ملنا مشکل ہے جنگلوں کو پہنچانے گئے نقصان کی بھر پائی اگر چہ مشکل ہے تاہم ناممکن نہیں لہذا محکمہ جنگلات کو پلا نٹیشن کے لئے وسیع سے وسیع تر اقدامات اٹھانے ہونگے تاکہ لٹے ہوئے جنگلوں کا کھویا ہوا حسن واپس لوٹایا جا سکے اور جنگلوں کی موجودگی کے باعث وادی کو بھی ناگہانی آفتوں سے جھوجھنے پر مجبور نہ ہونا پڑے۔