سیاسی لڑائی میںمیرے اہل خانہ اور دوستوں کو نہ لایا جائے ، میرے ساتھ مقابلہ کیا جائے / محبوبہ مفتی

بی جے پی کا کشمیر میں دکان بند ہو گیا ، جموں کشمیر میں مستقبل قریب میں اسمبلی انتخابات کا انعقاد ممکن نہیں

سرینگر/23دسمبر: حکومت ہند اور بی جے پی پر تحقیقات کے نام پر اہل خانہ کو ہراساں کرنے کا الزام عائد کرتے ہوئے پی ڈی پی صدر محبوبہ مفتی نے کہا کہ بی جے پی کو چاہئے کہ وہ سیاسی لڑائی از خود لڑے اور میرے اہل خانہ ، دوستوں اور رشتہ داروں کو اس میں لڑائی میں نہ لایا جائے۔ سی این آئی کے مطابق اپنی رہائش گاہ واقع گپکار سرینگر میں ایک پریس کانفرنس سے خطاب کرتے ہوئے پی ڈی پی صدر محبوبہ مفتی نے کہا کہ حکومت ہند نے میرے خلاف محاذ کھول دیا ہے اور ایجنسیاں خاص طور پر سی بی آئی ، این آئی اے اور ای ڈی کو میرے خلاف استعمال کیا جا رہا ہے ۔ انہوں نے کہا کہ حیرانگی کی بات یہ ہے کہ ان ایجنسیوں کو چاہئے تھا کہ وہ حساس کیسوں کی تحقیقات کرے تاہم انہوں نے اس معاملے کی تحقیقات شروع کر دی ہے کہ پی ڈی پی نے مرحوم مفتی محمد سعید کیلئے مزار کیلئے کہاں سے پیسہ لائیں ۔ جبکہ اتنا ہی نہیںکہ ان ایجنسیوں نے میرے والدہ کے بینک اکاوئنٹس کی جانچ کے علاوہ میری بہن کے جائیداد کی تفصیلات بھی طلب کی ہے جوکہ پیشہ سے ایک ڈاکٹر ہے ۔انہوں نے کہا کہ بی جے پی کو اپنے دم پر سیاسی لڑائی لڑنی چاہئے اور انہیں میرے خلاف محاذ کھولنے سے کوئی فائدہ حاصل نہیں ہوگا ۔ انہوں نے کہا کہ میرے پارٹی ممبران کو بنا کسی کیس کے حراست میں لیا گیا ہے جبکہ بنا کی وارنٹ کے ہی انہوں نے سرتاج مدنی کو بھی گرفتار کر لیا ۔ انہوں نے کہا کہ اسی طرح سے پی ڈی پی یوتھ صدر جنہوں نے کل ہی ڈی سی سی الیکشن میں بھاری اکثریت سے جیت درج کر لی این آئی اے کی تحویل میں ہے اور بغیر کسی جرم کے سزا کاٹ رہا ہے ۔ انہوں نے کہا کہ ڈی ڈی سی انتخابات میں پی اے جی ڈی نے شاندار کارکردگی کا مظاہرہ کرکے بھاری اکثریت حاصل کی ہے ۔جو کہ دفعہ 370کی منسوخی کے خلاف عوامی فیصلہ ہے ۔ انہوں نے کہا کہ جموںکشمیر میں اب بی جے پی کی دکان بند ہوئی ہے اور ان کا کہیں نا م ونشان نہیںہے ۔ جموںکشمیر میں اسمبلی انتخابات کے بارے میںبات کرتے ہوئے انہوں نے کہا کہ ابھی مستقبل قریب میں اسمبلی انتخابات کا انعقاد ممکن نہیںہے ۔