پونچھ کے کیر ی سیکٹر میںپھر شدید گولی باری ؛ گولی باری کے تازہ واقعات سے خوف و ہراس کا ماحول

سرینگر/02اکتوبر: لائن آف کنٹرول(ایل او سی)کے پونچھ کے کیر ی سیکٹر میں ہند پاک افواج کے مابین شدید گولی باری کے تازہ واقعات سے خوف و ہراس کا ماحول ہے اور اس بارے میں دونوں ملکوں نے حسب سابقہ ایک دوسرے پر جنگ بندی کی خلاف ورزی کا الزام عائد کیا ہے۔کرنٹ نیوز آف انڈیا کے مطابق فاعی ذرائع کا کہنا ہے کہ آج صبح 9بجکر30منٹ پرپاکستانی فوج نے بغیر کسی اشتعال کے پونچھ کے کیر ی سیکٹرمیںفوج کی چوکیوں کو نشانہ بناتے ہوئے فائرنگ شروع کردی جس سے وقت گزرنے کے ساتھ شدت اختیار کی۔فوج نے بھی مورچہ سنبھالتے ہوئے جوابی فائرنگ کی اور طرفین کے مابین گولی باری کا سلسلہ انتہائی شدت کے ساتھ جاری رہا۔دفاعی ذرائع نے بتایاکہ سرحد پار سے گولی باری کے دوران مارٹر شیل داغے گئے اور خود کار ہتھیاروں سے فائرنگ کی گئی۔جموں میں مقیم دفاعی ترجمان نے بتایا کہ پاکستانی فوج نے اِس پار کی فوجی چوکیوں کو نشانہ بنانے کی کوشش کی، تاہم اس سے فوج کو کسی قسم کا کوئی جانی یا مالی نقصان نہیں ہوا۔ترجمان نے کہا ’’ہمارے فوجی جوانوں نے فوری جوابی کارروائی عمل میں لائی اور اسی نوعیت کے ہتھیاروں سے فائرنگ کی‘‘۔آخری اطلاع ملنے تک گولی باری کا سلسلہ جاری تھا جس کے باعث علاقے میں خوف و ہراس پایا جارہا ہے۔گولی باری کے دوران زوردار دھماکے سنائی دئے اور سرحدوں کے نزدیک واقع بستیوں کے لوگ گھروں میں سہم کر رہ گئے۔یہ سلسلہ تین بجے تک جاری رہا لیکن یہاں بھی طرفین کو کسی قسم کا جانی یا مالی نقصان نہیں ہوا۔بھارت نے اس سلسلے میں پاکستان پر سیز فائر کی خلاف ورزی کا الزام عائد کیا ہے ۔یاد رہے کہ بدھ کے روز پونچھ میں پاکستانی گولہ باری کے نتیجے میں ایک فوجی جوان ہلاک ہوا تھا جبکہ ایک زخمی ہوا اس کے ایک دن بعد یعنی جمعرات کو سرحدی ضلع کپوارہ کے نوگام سیکٹر میں پاکستانی گولہ باری کے نتیجے میں دو فوجی اہلکار ہلاک اور دیگر چار زخمی ہوئے تھے ۔